देशातील दहा वर्षांपर्यंतच्या मुलांच्या आरोग्याची स्थिती जाणण्यासाठी केलेल्या अभ्यासातून भयावह परिस्थिती समोर आली आहे. मुंबई, दिल्ली, कोलकाता, पुणे आणि बंगळुरू या महानगरांतील सदर वयोगटातील मुले कुपोषणाला बळी पडत असून हा अदृश्य राक्षस देशाचे भवितव्य असलेल्या या मुलांची शारीरिक जडणघडण कमकुवत करण्याचे काम करत आहेत. मुंबईतील दर दहा मुलांपैकी चार कुपोषित आहेत हे वास्तव जितके भयावह आहे, त्याहून अधिक चिंताजनक स्थिती राजधानी दिल्लीत दिसते. तेथे दर दोन मुलांपैकी एकजण कुपोषित आहे. तसेच, कोलकाता येथील ४४ टक्के मुले कुपोषित असल्याचे सिद्ध झाले. तुलनेने पुण्यातील मुलांचे आरोग्य सुदृढतेकडे झुकलेले दिसते कारण तेथे १४ टक्के मुले कुपोषित दिसतात. बाहेरून दृश्यात्मक पातळीवर मोठे बदल दिसत नसल्याने या गोष्टीकडे लक्ष जात नाही आणि कुपोषणाचे मोजमाप करणारी राजरोस यंत्रणा आपल्याकडे नित्याच्या व्यवहाराचा भाग नाही. त्यामुळे ही बाब फार पटकन लक्षात येत नाही. या कुपोषित शरीरामुळे मुले आळशी होतात किंवा किरकिरी होतात, हे खरे. परंतु हा स्वभावाचा भाग म्हणून त्याकडे दुर्लक्ष होण्याची शक्यता असते. जन्मल्यापासून वयाच्या दहाव्या वर्षापर्यंतचा कालावधी शरीराच्या वाढीसाठी अत्यंत मोलाचा असतो. या काळात कुपोषणाला बळी पडलेल्या शरीराचे कायमस्वरूपी गंभीर नुकसान होते. त्यामुळेच कुपोषणाला 'अदृश्य साथ' असे म्हटले जाते. देशभरातील सुमारे ५९ हजार मुलांच्या रक्ताचे नमुने तपासल्याने हे वास्तव समोर आले. मेट्रोपोलिस लॅबोरेटरीज यांनी केलेल्या या सर्वेक्षणातून राजकर्ते तसेच पालकांच्या डोळ्यांत अंजन घातले तरच त्याचा फायदा आहे. अजूनही आपण मूलभूत पातळीवर कुठे कमी पडतो आहोत, हे लक्षात आल्यास त्याची तातडीने दखल घेतली जाईल ही आशा.
अदृश्य राक्षस
देशातील दहा वर्षांपर्यंतच्या मुलांच्या आरोग्याची स्थिती जाणण्यासाठी केलेल्या अभ्यासातून भयावह परिस्थिती समोर आली आहे. मुंबई, दिल्ली, कोलकाता, पुणे आणि बंगळुरू या महानगरांतील सदर वयोगटातील मुले कुपोषणाला बळी पडत असून हा अदृश्य राक्षस देशाचे भवितव्य असलेल्या या मुलांची शारीरिक जडणघडण कमकुवत करण्याचे काम करत आहेत.
30 6 Feb 2019, 6:29 am