बहुमत नसतानाही अन्य पक्ष आणि अपक्ष आमदार यांच्याशी निवडणूकपश्चात युती करून मणिपूरमध्ये सत्तेवर आलेले भारतीय जनता पक्षाचे सरकार आता अल्पमतात आले असून, ईशान्येकडील या छोट्याशा राज्यातील राजकारणाला गती आली आहे. सत्ताधारी पक्षातील आमदारांना गळाशी लावून, सरकार पाडून, आपली सत्ता आणण्यासाठी भाजपकडून कर्नाटक, मध्य प्रदेशात राबविलेल्या 'ऑपरेशन कमळ'च्या बरोबर उलटे मणिपूरमध्ये घडले आहे. साठ जागा असलेल्या मणिपूर विधानसभेत २०१७च्या निवडणुकीत २८ जागा मिळवून, सर्वांत मोठा पक्ष ठरूनही सत्तेवर येऊ न शकलेल्या काँग्रेसला, या पेचप्रसंगानंतर तरी संधी मिळते, की भाजप आणखी काही डावपेच खेळतो, हे काही दिवसांत स्पष्ट होईल. राज्यपाल नजमा हेपतुल्ला, तसेच विधानसभेचे अध्यक्ष वाय. खेमचंदसिंह यांच्या भूमिकेवरही अनेक गोष्टी अवलंबून आहेत. २०१७मध्ये चपळाई न दाखविल्याने सत्तेपासून दूर राहिलेल्या काँग्रेसने आता वेगाने हालचाली सुरू केल्या असून, मुख्यमंत्री एन. बीरेन सिंह यांच्याबरोबर विधानसभा अध्यक्षांवरही अविश्वासाचा ठराव मांडण्यासाठी पावले टाकली आहेत. त्यासाठी विधानसभेचे अधिवेशन बोलाविण्याची मागणीही केली आहे. काँग्रेसचे सात आमदार आपल्याकडे वळवून भाजपने बहुमताचे गणित जुळवले असले, तरी नंतर न्यायालयाने या आमदारांना सभागृहात येण्यास मनाई केली. दुसऱ्या एका प्रकरणात आणखी एका आमदाराला न्यायालयाने अपात्र ठरविले. कायदेशीर लढाईत असा फटका बसल्याच्या पार्श्वभूमीवर खुद्द भाजपच्या चार आमदारांनी राजीनामे दिले आहेत, तर सरकारमध्ये असलेल्या नॅशनल पीपल्स पार्टीच्या (एनपीपी) चार मंत्र्यांनी राजीनामे देऊन पाठिंबा काढून घेतला आहे. एका अपक्षासह अन्य पक्षांच्या आमदारांनी भाजपला सोडचिठ्ठी दिल्याने, भाजप तिथे बहुमत गमावत २३ जागांपर्यंत खाली आला आहे. काँग्रेसच्या २८पैकी सात जण सभागृहात येऊ शकत नाहीत, तर एक अपात्र ठरला आहे; त्यामुळे काँग्रेसचे संख्याबळ २० आहे. बीरेन सिंह सरकारचा पाठिंबा काढून घेतलेले सहा आमदार आता काँग्रेसच्या मागे उभे राहू शकतात. न्यायालयीन निकालानंतर मणिपूर विधानसभेत सध्या ५२ जागा असून, काँग्रेसला बहुमतासाठी एक जागा कमी पडते; त्यामुळे तेथील सत्तेचा खेळ रंगणार असे दिसते.
अनपेक्षित दिलासा
बहुमत नसतानाही अन्य पक्ष आणि अपक्ष आमदार यांच्याशी निवडणूकपश्चात युती करून मणिपूरमध्ये सत्तेवर आलेले भारतीय जनता पक्षाचे सरकार आता अल्पमतात आले ...
महाराष्ट्र टाइम्स.कॉम 22 Jun 2020, 5:47 am