मोदींना घरचा आहेर

नोटाबंदीमुळे दोन वर्षांपूर्वी रब्बी हंगामात शेतकऱ्यांना बियाणे आणि खतांची खरेदी वेळेवर करता आली नाही, त्यामुळे शेतकऱ्यांचे मोठे नुकसान झाले, अशा आशयाच्या केंद्रीय कृषी मंत्रालयाच्या अहवालामुळे केंद्र सरकार अडचणीत आले आहे. वीरप्पा मोईली यांच्या अध्यक्षतेखालील संसदेच्या स्थायी समितीने शेती, रोजगार तसेच उद्योगांवर झालेल्या परिणामांची संबंधित खात्यांकडून माहिती मागवली. त्यानुसार शेती खात्याच्या अहवालात शेतकऱ्यांच्या दैन्यावर प्रकाश टाकण्यात आला आहे. नोटाबंदी झाली तेव्हा शेतकऱ्यांनी खरिपाचे उत्पादन बाजारात आणले होते आणि रब्बीची पेरणी करत होते. अशा काळात रोकड गरजेची होती, परंतु चलनटंचाई निर्माण झाल्यामुळे शेतकरी बियाणे आणि खते खरेदी करू शकले नाहीत. मोठ्या शेतकऱ्यांनाही मजुरांची मजुरी देण्यात तसेच शेतीच्या अन्य गरजांची पूर्तता करण्यात अडचणी आल्या. एवढेच नव्हे, तर राष्ट्रीय बियाणे महामंडळाकडील एक लाख ३८ हजार क्विंटल गव्हाचे बियाणे विकले गेले नसल्याचेही अहवालात म्हटले आहे. हा अहवाल म्हणजे ऐन निवडणूक काळात भाजपसाठी घरचा आहेर म्हणावा लागेल. नोटाबंदीचा सगळ्यांना फायदा झाला आणि फक्त गांधी कुटुंबाचे नुकसान झाले, अशा बढाया सभांमधून मारणाऱ्या पंतप्रधान नरेंद्र मोदींसाठी त्यांच्याच खात्याने खोटे ठरवले. नोटाबंदीची द्विवर्षपूर्ती सरकार किंवा भाजपने साजरी केली नाही, त्यातूनच तिचे अपयश सिद्ध होते. परंतु पाच राज्यांतील प्रचारात राहुल गांधी यांनी नोटाबंदीवरून टीका सुरू केल्यानंतर प्रत्त्युतर म्हणून मोदींनी गांधी कुटुंबाला लक्ष्य केले. या अहवालाच्या बातम्या प्रसिद्ध झाल्यानंतर केंद्रीय कृषिमंत्री राधामोहन सिंह यांनी सारवासारव केली तरी वस्तुस्थिती लपत नाही. कारण नोटाबंदीचे जे कवित्व दोन वर्षांनंतर सुरू आहे त्यातून फारसे सकारात्मक घडलेले दिसत नाही. उलट त्याचे दुष्परिणामच ठळकपणे समोर येत आहेत. मात्र तरी राजकीय मैदानात त्या निर्णयाचे समर्थन केले जात होते. मात्र या अहवालाने केंद्र सरकारला आरसा दाखवला आहे.