श्रुती पलनीअप्पन
...........
हिलरी क्लिंटन यांची अध्यक्षीय निवडणुकीची उमेदवारी २०१६ मध्ये फिलाडेल्फिया येथील 'डेमॉक्रॅटिक राष्ट्रीय अधिवेशना'त निश्चित झाली. तेव्हा साऱ्या देशातून जमलेल्या प्रतिनिधींमध्ये अवघ्या १८ वर्षांची युवती सर्वांचे लक्ष वेधून घेत होती. ती अर्थातच सर्वांत तरुण डेमॉक्रॅटिक पक्षप्रतिनिधी होती. ती होती भारतीय वंशाची श्रुती पलनीअप्पन. ही श्रुती आता हार्वर्ड या जगविख्यात विद्यापीठातील पदवी-पूर्व विद्यार्थी मंडळाची अध्यक्ष म्हणून निवडून आली आहे. वीस वर्षांच्या श्रुतीने निवडून येताक्षणी एखाद्या मुरलेल्या नेत्याच्या गांभीर्याने विद्यापीठाच्या सहकार्याने विद्यार्थ्यांसाठी कोणते उपक्रम करायचे आहेत, याची यादीच सादर केली. हार्वर्ड विद्यापीठात पदवी-पूर्व शिक्षण घेणाऱ्या विद्यार्थ्यांचा मतदारसंघ श्रुती आणि तिची उपाध्यक्ष झालेली सहाध्यायी हुसा यांच्यामागे इतका भक्कम उभा राहिला की, या दोघींना ४१ टक्के मते मिळाली. त्यांच्या विरोधकांना मिळाली २६ टक्के मते. श्रुतीने या निवडणुकीत उतरताना घोषणा दिली, 'मेक हार्वर्ड होम.' ही सोपी पण अर्थपूर्ण घोषणा जगभरातून आलेल्या मुलामुलींना आवडली. श्रुती म्हणते, 'विद्यार्थ्यांशी संवाद साधण्याची अधिक परिणामकारक पद्धत विद्यापीठात रुजावी, यासाठी काम करावयाचे आहे आणि त्यासाठी (नाताळच्या) सुटीपूर्वीच मी काही ठोस कार्यक्रम जाहीर करीन.' श्रुतीचा जन्म अमेरिकेत झाला असला तरी तिचे आईबाबा चेन्नईतून १९९२मध्ये तेथे गेले आणि स्थिरावले. श्रुतीला कोणत्याही ऐकीव इतिहासात रमण्यापेक्षा भविष्य साद घालत असावे. त्यामुळेच, या कौन्सिलची अध्यक्ष होण्याआधी ती त्यातील शिक्षण उपसमितीची प्रमुख होती आणि तेथेही तिने अनेक सूचना करून ठसा उमटवला. 'यत्र विश्वं भवति एकनीडम्' म्हणजे जेथे सारे जगच एक घरटे होऊन असते, असे 'विश्वभारती'चे घोषवाक्य आहे. श्रुतीने ते हार्वर्डमध्ये खरे करून दाखवले आहे!