राज्यातील खान्देश, मराठवाडा, विदर्भातील काही जिल्ह्यांनी गेल्या तीन दिवसांत अस्मानी संकटाचा मार सोसला. एकीकडे करोनाची भीती; त्यात ही भर. अपवाद वगळता ग्रामीण भागात करोनाचा प्रादुर्भाव नसल्याने मोठा दिलासा असला तरी, शेतकऱ्यांच्या वाट्याला येणारा रोजचा संघर्ष त्यांचा कायम कस पाहत असतो. हंगाम सध्या सोंगणी-कापणीचा आहे. शेतात डोलणाऱ्या उत्पादनावरून स्वत:ला दिलासा देण्याचा आणि नव्या हंगामाची तयारी सुरू करण्याचा आहे. पण सारेच सुरळीत होईल, असे कसे! पेरणीच्या हंगामापासून कापणीच्या हंगामापर्यंत अधांतरीपणाची एक वेगळीच मनोवस्था शेतकऱ्यांच्या वाट्याला येत असते. दरसाल हे असेच असते. कोरडवाहू शेतकऱ्यांच्या वाट्याला येणारी ही अगतिकता अधिक तीव्र असते. पीक अंकुरण्याचे, ते वाढविण्याचे आणि कापणीला आलेले पीक विकले जाईपर्यंत पोसण्यासाठी झटणाऱ्या शेतकऱ्याची बाजारपेठ परीक्षा घेतेच. निसर्ग हमखास घेतो. आताही घेतलीच आहे. अवकाळी पावसाने, गारपिटीने तडाखा दिला आहे. मराठवाड्यातील लातूर, बीड, उस्मानाबाद, जालना, खान्देशातील जळगाव, धुळे, नाशिक, विदर्भातील वर्धा, बुलडाणा, वाशीम या जिल्ह्यांना वादळी पाऊस आणि गारपिटीने पिकांचे मोठे नुकसान केले आहे. वर्धा जिल्ह्याला अवकाळी पावसाने दहा दिवसांत तिसऱ्यांदा तडाखा दिला आहे. लातूर जिल्ह्यातील सुमारे पाच, जळगाव जिल्ह्यातील सुमारे सात, वर्धा जिल्ह्यातील पाच, बुलडाणा जिह्यातील सहा तालुके कमालीचे प्रभावित झाले आहेत. आणखीही गावे या संकटाने बाधित आहेत. काही तालुक्यांचा गारपिटीचा मार जबर आहे. गहू, ज्वारी, हरभरा, मका, केळी, भाजीपाल्याचे नुकसान झाले आहे. काही ठिकाणी तर बघवणार नाही अशी स्थिती आहे. पीक पार आडवे झाले आहे. 'हे शेतकऱ्यांचे सरकार आहे', असे मुख्यमंत्री उद्धव ठाकरे वारंवार सांगतात. शेतकऱ्यांना दिलासा देण्याचे प्रयत्न सुरूही आहेत. पण कापूस खरेदी केंद्र उशिराने सुरू होतात, तूरखरेदी प्रक्रियेत जात आडवी येते आणि सोयाबीनमधला ओलावा मोबदल्याच्या आड येतो तेव्हा मन:स्ताप होतो. आताच्या या अवकाळी संकटामुळे झालेल्या नुकसानीचे पंचनामे केले जात आहेत. तत्काळ ते सरकारपर्यंत पोहोचतील आणि सरकारकडून तत्परतेने शेतकऱ्यांपर्यंत मदत पोहोचेल अशी आशा आहे.
अवकाळी संकटाची बाधा
राज्यातील खान्देश, मराठवाडा, विदर्भातील काही जिल्ह्यांनी गेल्या तीन दिवसांत अस्मानी संकटाचा मार सोसला एकीकडे करोनाची भीती; त्यात ही भर...
महाराष्ट्र टाइम्स.कॉम 20 Mar 2020, 4:00 am