आयपीएल सामन्यांचा ‘इंडिया का त्योहार’ समाप्त होत असतानाच प्रो कबड्डीचा थरार सुरू होतो आहे. मात्र, या दोन्ही हंगामांमध्ये जमीन-अस्मानाचे अंतर आहे. क्रिकेट हा मूळचा कुर्रेबाज, श्रीमंती खेळ तर कबड्डी हा आशियातील सर्वसामान्य तडफदार तरुणांचा बिनसामग्रीचा खेळ. क्रिकेटमध्ये पोत्याने पैसा तर कबड्डीसाठी कालपरवापर्यंत पारितोषिकांसाठी देणग्या मिळण्याची मारामार. आता मात्र चित्र बदलते आहे. या अस्सल देशी वाणाच्या खेळालाही पैसा दिसू लागला आहे. इ. स. २०१४मध्ये म्हणजे अवघ्या तीन वर्षांपूर्वीच हा प्रो कबड्डीचा नवा अवतार प्रथम मैदानात उतरला. आज तीन वर्षांनी या स्पर्धेतील सर्वाधिक बोली ९३ लाखांपर्यंत गेली आहे. निष्णात चढाईपटू म्हणून ओळखल्या जाणाऱ्या नितीन तोमर या आक्रमक खेळाडूला उत्तर प्रदेश संघाने ही रक्कम लिलावात देऊ केली. प्रो कबड्डी लोकप्रिय होत असल्याची ही एक खूण आहे. स्पर्धेतील संघांची संख्याही यंदा १२ वर पोहोचली आहे. जितके संघ जास्त, तितकी स्पर्धा अधिक काळ चालणार आणि अधिक रंगतदार होणार. यंदाचा हंगाम त्यामुळेच तब्बल १३ आठवड्यांचा आहे. उत्तर प्रदेश, गुजरात, तामिळनाडू आणि हरयाणा या चार नव्या संघांना यंदा आपले कसब दाखविण्याची संधी आहे. यातील गुजरातने इराणच्या अबोझार या खेळाडूला तब्बल ५० लाख मोजून आपल्या संघात घेतले आहे. इराणने गेल्या वर्षी कबड्डीच्या जागतिक चषक स्पर्धेत अंतिम फेरीत धडक मारली होती. स्वाभाविकच, यंदा इराणी खेळाडूंना मोठी मागणी होती. तब्बल ११ परदेशी खेळाडू यावेळी १२ संघांमध्ये वाटले गेले आहेत. भारत हे केवळ क्रिकेटचे नव्हे तर इतरही खेळांचे मोठे मार्केट बनत असल्याचे हे लक्षण आहे. अर्थात, ही अनुकूलता भारताच्या आर्थिक ताकदीमुळे निर्माण होते आहे. प्रश्न इतकाच आहे की, ही अनुकूलता आपण केवळ मनोरंजनापुरती मर्यादित ठेवणार की तिचा लाभ उठवून देशभर क्रीडाप्रेमाचे एक नवे, रसरशीत वातावरण तयार करणार? ऑक्टोबरमध्ये भारतात १७ वर्षांखालील फुटबॉल वर्ल्ड कप सुरू होणार आहे. त्यातही, २४ संघ असतील. अशा स्पर्धा आयोजित करता करता देशातील प्रत्येक गावात कबड्डी आणि फुटबॉलसारखे खेळ खेळले गेले पाहिजेत. कोट्यवधी मुले आणि मुली असे मैदानी खेळ खेळतील, तेव्हा या दिमाखदार स्पर्धांना खरा अर्थ येईल. तसा तो लवकरात लवकर यावा!
आता प्रो कबड्डीचा जल्लोष
आयपीएल सामन्यांचा ‘इंडिया का त्योहार’ समाप्त होत असतानाच प्रो कबड्डीचा थरार सुरू होतो आहे. मात्र, या दोन्ही हंगामांमध्ये जमीन-अस्मानाचे अंतर आहे. क्रिकेट हा मूळचा कुर्रेबाज, श्रीमंती खेळ तर कबड्डी हा आशियातील सर्वसामान्य तडफदार तरुणांचा बिनसामग्रीचा खेळ.
Maharashtra Times 24 May 2017, 1:56 am