देशात आणि जगभरात होत असलेल्या आर्थिक व राजकीय घडामोडींचा परिणाम भारतीय शेअर बाजाराच्या निर्देशांकावर होत आहे. गेल्या अवघ्या दोन दिवसांची घसरण सुमारे ८०० अंकांची होती. ती पाहता या काळात गुंतवणूकदारांनी पावणेतीन हजार कोटी रुपये गमावले. बुधवारीही बाजार उघडला तेव्हा त्यात नवीन उत्साह दिसला नाही, उलट मंगळवारसारखाच निरुत्साही प्रारंभ होऊन त्यात पुन्हा सुमारे १७० अंशांची घसरण झाली. त्यामुळे गुंतवणूकदारांच्या नुकसानीत भरच पडली. गेले काही आठवडे वाढत असलेले पेट्रोलचे भाव या विक्रीस कारणीभूत असल्याचे विश्लेषकांचे मत आहे. शिवाय पेट्रोलच्या वाढत्या दराशी रुपयाची घसरणही कारभूत असल्याने डॉलरच्या तुलनेत रुपया सतत गडगडत आहे. रिझर्व्ह बँकेने अद्याप त्यात हस्तक्षेप करण्याचा निर्णय घेतलेला नाही. भारताकडे असलेली डॉलरची गंगाजळी पुरेशी मजबूत असून रिझर्व्ह बँक बाजारपेठ हस्तक्षेप पद्धतीनुसार परकीय चलन बाजारात अंदाजे २५ अब्ज डॉलर्सची विक्री करून रुपया सावरू शकते. परंतु सध्यातरी तसे करण्याची मानसिकता दिसत नाही. कदाचित, रिझर्व्ह बँकेने चलनवाढीच्या मुद्द्यावर अधिक लक्ष केंद्रित केल्यामुळे तिने हस्तक्षेप करण्याचे टाळले असेल. परिणामी रुपया रोज नवीन उच्चांकी महाग दर प्राप्त करत आहे. पेट्रोलचे दर आणि डॉलर यांचा एकमेकांवर प्रभाव पडत असल्याने त्याचा दबाव शेअर बाजारावर आला आहे. बँकांच्या प्रस्तावित विलिनीकरणालाही बाजाराने नकारात्मक कौल दिला. तसेच, अमेरिका व चीन या दोन मोठ्या आर्थिक व्यवस्थांमध्ये नव्याने सुरू झालेला व्यापारसंघर्ष शेअर बाजारावर नवीन दबाव आणताना दिसत आहे. या व्यापारयुद्धाची झळ मंगळवारी आणि बुधवारी सेन्सेक्सला लागलेली दिसली. त्यामुळे कोणत्यातरी एक घटकाचा दबाव सौम्य होत नाही तोवर बाजार दबावाच्या भावनेतून बाहेर पडणे कठीण दिसते.
विक्रीचा दबाव
देशात आणि जगभरात होत असलेल्या आर्थिक व राजकीय घडामोडींचा परिणाम भारतीय शेअर बाजाराच्या निर्देशांकावर होत आहे...
Maharashtra Times 20 Sep 2018, 6:14 am