अस्थानी उद्रेक

आई होताना जिवावरच्या आजारातून उठलेली सेरेना विल्यम्स जिद्दीने टेनिस कोर्टवर परतली. त्यानंतर विम्बल्डन किताब दहाव्यांदा जिंकला तेव्हा तिचे अश्रू जणू ही संघर्षकथाच सांगत होते. पण परवा यूएस ओपन टेनिस स्पर्धेच्या अंतिम सामन्यात जपानच्या नाओमी ओसाकाकडून पराभव स्वीकारताना सेरेनाला वर्तनावर नियंत्रण ठेवता आले नाही. टेनिस सामन्यांमध्ये बाहेरून कोचने हातवारे अथवा खाणाखुणा करून मार्गदर्शन करणे फुटबॉलसारखे मंजूर नाही. तो नियमभंग ठरतो. या अंतिम सामन्याचे पंच कार्लोस रामोस यांनी बाहेरून सेरेनाला खुणावणाऱ्या पंचाला दटावले. तेव्हा, 'मी एकवेळ पराभव स्वीकारेन पण असे वागणार नाही' असे सेरेना म्हणाली. पण तिने वाद थांबवला नाही. शिक्षा देणाऱ्या पंचांना ती 'पॉइंटचोर' म्हणाली. या वादात पंचांनी तिला एकापाठोपाठ एक तीन पॉईंट्सची शिक्षा दिली. स्वाभाविक दुसरा सेट नाओमीने पटकन् जिंकला आणि विजेतेपदही. मात्र, महिला असल्याने आपल्यावर हा अन्याय झाला, या सेरेनाच्या आरोपावर मार्टिना नवरातिलोव्हा हिने 'तिथे पुरुष खेळाडू असता तरी असे वागणे चूकच होते' असे म्हणून सेरेनाचे समर्थन करणे टाळले आहे. मुख्य म्हणजे पंच रामोस यांनी आता 'आपण काही चूक वागलो असे आपल्याला वाटत नाही,' असे सांगून सेरेनाचे आरोप योग्य नसल्याचे म्हटले आहे. रामोस यांनी सेरेनाला १३ हजार पौंडांचा दंडही ठोठवला. कोच बाहेरून खाणाखुणा करून काही सांगत असल्याचे सेरेनाने पाहिले नसले तरी तिने मग स्वत:ची रॅकेट का तोडावी आणि पंचांशी वाद तरी का घालावा, हा मार्टिनाचा सवाल योग्य आहे. काहींनी महिला खेळाडूंना पंच नेहेमीच अधिक अनुदार वागवतात, असेही म्हटले आहे. मात्र, सेरेनासारख्या जगज्जेत्या खेळाडूने संयम न गमावता आपली बाजू मांडण्याचे कौशल्य दाखवायला हवे होते. तिथे ती चुकली.