पवारांचे ‘चड्डी’ स्मरण

महाराष्ट्राचे 'जाणते राजे' शरद पवार यांनी निवडणुकीच्या प्रचारामध्ये वाद सुरू करण्याची परंपरा कायम ठेवली आहे. त्यांच्यासारख्या नेत्यालाही पातळी सोडून विरोधकांच्या प्रचाराला उत्तर द्यावेसे वाटू लागले आहे. वास्तविक त्यांना यावेळी गमाविण्यासारखे काहीच नाही. मात्र, पंतप्रधानपदाची स्वप्ने पडू लागल्याने ते सक्रिय झाले आहेत. याचवेळी अनेक विश्वासू सहकारी त्यांना सोडून जात असल्याचा धक्का त्यांना सहन झालेला नाही. म्हणूनच विजयसिंह मोहिते पाटील यांना त्यांनी राष्ट्रीय स्वयंसेवक संघाची अर्धी चड्डी घालून मांड्या न दाखविण्याचा सल्ला दिला आहे.

खरेतर संघाची वाट कॉँग्रेसमधील अनेक नेत्यांना दाखविण्यामध्ये पवारांची महत्त्वाची भूमिका राहिली आहे. संघ व भाजपच्या पूर्वावताराला सोबत घेऊनच वसंतदादा पाटील यांच्या पाठीत खंजीर खुपसून सर्वप्रथम मुख्यमंत्रिपदाची शपथ घेतल्याचा इतिहास ते विसरले असले, तरी महाराष्ट्र विसरलेला नाही. इतकेच कशाला तर पवारांना आपल्या विविध वाढदिवसांच्या सत्कार समारंभालाही ही अर्धी चड्डी घालणारे अटलबिहारी वाजपेयी किंवा नरेंद्र मोदीच लाभले होते हे संपूर्ण देशाने बघितले आहे. अगदी अलीकडे पिंपरी चिंचवडमधल्या लक्ष्मण जगतापांनीही ही अर्धी चड्डी घातल्यामुळे पवारांच्या हृदयाला यातना झाल्या असाव्यात. आता मोहिते पाटलांनाही त्याच रूपात बघायला लागते की काय या भीतीने ते बहुधा अस्वस्थ झाले आहेत.

उद्या आकड्यांचा खेळ उलट सुलट झाला, तर पवार अर्धी चड्डी घालणाऱ्या व बारामतीमध्ये येऊन पवारांना उखडण्याची भाषा करणाऱ्या अमित शहांच्या शेजारी जाऊन बसले तर कुणाला नवल वाटणार नाही. या निमित्ताने पुन्हा एकदा पवारांनी आपली विश्वासार्हता पणाला लावली आहे, इतकेच. तसेही, पवार विश्वासार्हतेबद्दल कधीच प्रसिद्ध नसल्याने त्यांचे हे वक्तव्यही फार कोणी गांभीर्याने घेणार नाही.