अ‍ॅपशहर

‘तीन मूर्ती’चा वाद

देशात आजवर झालेल्या सर्व पंतप्रधानांच्या स्मृतींचे जतन करण्यासाठी एक स्वतंत्र स्मारक तयार करण्याचा निर्णय केंद्र सरकारने घेतला आहे. या स्मारकासाठी राजधानी दिल्लीतील 'तीन मूर्ती भवन' अर्थात 'नेहरू मेमोरियल म्युझियम अॅण्ड लायब्ररी'ची जागा निश्चित करण्यात आली आहे.

Maharashtra Times 29 Aug 2018, 12:00 am
देशात आजवर झालेल्या सर्व पंतप्रधानांच्या स्मृतींचे जतन करण्यासाठी एक स्वतंत्र स्मारक तयार करण्याचा निर्णय केंद्र सरकारने घेतला आहे. या स्मारकासाठी राजधानी दिल्लीतील 'तीन मूर्ती भवन' अर्थात 'नेहरू मेमोरियल म्युझियम अॅण्ड लायब्ररी'ची जागा निश्चित करण्यात आली आहे. मात्र, वाढता विरोध पाहता याचा अंतिम निर्णय पुढे ढकलण्यात आला. माजी पंतप्रधान डॉ. मनमोहन सिंग यांनीही पंतप्रधान नरेंद्र मोदी यांना पत्र लिहून पंडित नेहरू यांचे स्मृतिस्थळ असलेल्या तीन मूर्ती भवनाचे महत्त्व कायम राहू द्यावे, अशी भूमिका मांडली. इंग्रज सरकारच्या सर्वोच्च लष्करी अधिकाऱ्याचे निवासस्थान म्हणून १९३० साली 'तीन मूर्ती भवन' बांधण्यात आले. देश स्वतंत्र झाल्यानंतर पहिले पंतप्रधान म्हणून पंडित नेहरू सोळा वर्षे याच वास्तूत वास्तव्याला होते. त्यांच्या मृत्यूनंतर तीन मूर्ती भवनाचे रूपांतर स्मारकात करण्यात आले. इतर पंतप्रधानांच्या स्मारकाचे निमित्त पुढे करून पंडित नेहरूंचे महत्त्व कमी करण्याचा हा प्रयत्न असावा, अशी भावना काँग्रेसचे कार्यकर्ते आणि नेत्यांमध्ये निर्माण झाली तर ते साहजिकच म्हणावे लागेल. दुसरीकडे, सध्या अस्तित्वात असलेल्या 'नेहरू मेमोरियल म्युझियम अॅण्ड लायब्ररी'च्या कुठल्याही भागाला धक्का लावला जाणार नाही, असे सरकारने स्पष्ट केले आहे. तीन मूर्ती भवनाच्या अखत्यारीतील २५ एकरांपैकी केवळ अर्ध्या एकरावर पंडित नेहरू यांचे स्मारक आहे. त्यामुळे, उर्वरित रिकाम्या जागेवर नवे स्मारक उभारण्यास कुठलीही अडचण नाही, असे सरकारचे म्हणणे दिसते. नवी दिल्लीत येणारे पर्यटक तीन मूर्ती भवनला अवश्य भेट देतात. त्यावेळी त्यांच्यावर पंडित नेहरू यांच्या कार्याचा ठसा सहजपणे उमटतो. भविष्यात पंतप्रधानांचे एकत्रित स्मारक निर्माण झाले तर लालबहादूर शास्त्री यांच्यापासून वर्तमान पंतप्रधान नरेंद्र मोदी यांच्यापर्यंतच्या प्रत्येक पंतप्रधानांचा जीवनपट पर्यटकांपुढे उभा राहील. यातून सहाजिकच नेहरू यांचे महत्त्व कमी होईल, हा काँग्रेस पक्षाचा अंदाज चुकीचा नाही. पंतप्रधानांच्या स्मारकाबाबतच्या सर्व आक्षेपांचे निराकरण सरकार करेल, असे आश्वासन केंद्रीय गृहमंत्री राजनाथ सिंह यांनी दिले आहे. त्यामुळे या वादातून सकारात्मक तोडगा निघेल, अशी आशा आहे.
महाराष्ट्र टाइम्स.कॉम the dispute of trimurti bhavan
‘तीन मूर्ती’चा वाद

महत्वाचे लेख

Marathi News App: तुम्हालाही तुमच्या अवतीभवती होत असलेल्या बदलांमध्ये सहभागी व्हायचं आहे? सिटिझन रिपोर्टर अॅप डाउनलोड करा आणि रिपोर्ट्स पाठवा.
ताज्या बातम्यांसह अपडेट राहण्यासाठी लाइक करा Maharashtra Times फेसबुकपेज