अमेरिकेतील जगविख्यात साप्ताहिक 'टाइम'च्या मुखपृष्ठावर वर्षअखेरीस जगातील सर्वाधिक प्रभावशाली व्यक्ती म्हणून अखेर अमेरिकेचे नवनियुक्त भावी राष्ट्राध्यक्ष डोनाल्ड ट्रम्प यांची निवड झाली आणि कधी नव्हे ती भारतात पंतप्रधान नरेंद्र मोदी यांच्या नावाला घेऊन या घटनेभोवती काही दिवस सुरू मोहीम मावळली. भारतात काळ्या पैशावर वार करण्याच्या हेतूने नोटाबंदी करून आर्थिक कोंडी करणाऱ्या पंतप्रधानांऐवजी 'टाइम'ने ‘युनायटेड स्टेट्स ऑफ अमेरिके’त निवडल्या गेलेल्या ‘डिव्हायडेड स्टेट्स ऑफ अमेरिके’च्या अध्यक्षाला हे स्थान दिले. ११ जणांच्या अंतिम यादीत मोदी यांचा समावेश होता, तरी यंदा त्यांची निवड होण्याची शक्यता कमीच होती. सोशल मिडियावर त्यांच्यासाठी नेहमीच्या पद्धतीने जोरदार प्रयत्न झाले. भारतातील संख्याबळाच्या आधारे ऑनलाईन मुसंडीतून मोदी यांनाच सर्वाधिक पसंती आहे, असे सिद्ध होऊन नियतकालिकाच्या मुखपृष्ठावर ते आले असते तर आंतरराष्ट्रीय पातळीवर या नोटाबंदीला पाठिंबा आहे, असे सिद्ध झाल्याचे सांगण्याची संधी सरकार आणि मोदीसमर्थकांना मिळाली असती. 'टाइम'तर्फे १९२७ सालापासून ही वर्षभरातील जगातील सर्वाधिक प्रभावशाली व्यक्ती शोधून त्याला ‘पर्सन ऑफ द इयर’ हा सन्मान मुखपृष्ठावर स्थान देऊन बहाल करण्याची प्रथा सुरू केली. आतापर्यंत यात अॅडॉल्फ हिटलर, महात्मा गांधी, इराणचे अयातुल्ला खोमेनी, फ्रान्सिस पोप आदींना हे स्थान मिळाले असून अमेरिकेच्या जवळपास प्रत्येक राष्ट्राध्यक्षाला कधी ना कधी हा मान लाभला आहे. काहीवेळा एखाद्या समूह अथवा गटालाही हा सन्मान दिला जातो. इ.स. १९८२ साली जगातील सर्वाधिक प्रभावशाली घटक व्यक्ती नसून कम्प्युटर होता! तेव्हा त्याला ‘मशीन ऑफ द इयर’ असे संबोधित करण्यात आले होते. यंदाचे मानकरी ट्रम्प यांची ही निवड झाल्यानंतर ‘टाइम’ने लेखात त्यांचा जगावरचा प्रभाव भविष्यात चांगला असेल की वाईट, असा सवाल केला आहे. भविष्यातील वादळी घडामोडींवर ट्रम्प यांचा असणारा प्रभाव अधोरेखित करत त्यांच्या निवडीचे या लेखात समर्थन केले आहे. अपेक्षेप्रमाणे त्यावर लगेच वाद आणि विडंबन सुरू झाले. ट्रम्प यांना मुखपृष्ठावरील छायाचित्रात खलनायकाचे रूप देण्याचा प्रयत्न झाल्याचाही आरोप झाला. मात्र, ट्रम्प यांनी आधीचा आपला विरोध बाजूला ठेवून ‘टाइम’च्या निवडीचे स्वागत केले आहे.
ट्रम्प यांचा ‘टाइम’
अमेरिकेतील जगविख्यात साप्ताहिक 'टाइम'च्या मुखपृष्ठावर वर्षअखेरीस जगातील सर्वाधिक प्रभावशाली व्यक्ती म्हणून अखेर अमेरिकेचे नवनियुक्त भावी राष्ट्राध्यक्ष डोनाल्ड ट्रम्प यांची निवड झाली आणि कधी नव्हे ती भारतात पंतप्रधान नरेंद्र मोदी यांच्या नावाला घेऊन या घटनेभोवती काही दिवस सुरू मोहीम मावळली.
Maharashtra Times 9 Dec 2016, 4:04 am