महिला शक्तीचा जागर

आदिशक्ती म्हणून स्त्रीशक्तीचा कौतुकमिश्रित गौरव केला जातो. विशेषत: महिला दिनी व नवरात्रोत्सवात तर स्त्री सामर्थ्याचा अभूतपूर्व जागर होत असतो. वास्तवात आजही ही आदिशक्ती कोणाच्या तरी कृपेवर जगते असेच वातावरण बव्हंशी आढळते. महिला सक्षमीकरण, स्त्री स्वातंत्र्य हे केवळ बोलाची कढी अन् बोलाचाच भात असल्याचे अनुभव पावलोपावली येत असतात. विविध क्षेत्रे आज महिलांनी पादाक्रांत केली असली तरी प्रत्यक्षात जिथे ती आपल्या कर्तृत्वाचा ठसा उमटविते त्या ठिकाणी तिची कशी अक्षम्य हेळसांड होते याची असंख्य उदाहरणे घडत असतात. मग अशा ठिकाणी महिला सुरक्षित रहाव्या यासाठी यंत्रणेला कायद्याची मदत घ्यावी लागते.

महिलांबाबत असा दुजाभाव केला जात असल्याच्या पार्श्वभूमीवर खऱ्या अर्थाने महिलांना सबल करण्याचा प्रयोग म्हणून नाशिक पोलिसांनी दर शनिवारी महिलांकडे पोलिस ठाण्यांची जबाबदारी सोपविण्याच्या निर्णयाकडे पहावे लागेल. पोलिस आयुक्त डॉ. रवींद्र सिंगल यांच्या संकल्पनेतून हे महिलाराज प्रत्यक्षात येत आहे. पोलिस दलात महिलांचा टक्का तीस टक्के होऊनही आता जमाना लोटला. पण तिथेही पुरुषी अहंकार, महिलांबद्दल समज-गैरसमज, त्यांच्या क्षमतेची शंका या व इतर अनेक कारणांमुळे या महिलांकडे क्वचितच महत्त्वाची कामे सोपविली जात. जिथे ताकद, बुद्धी व सर्वव्यापी क्षमतांचा कस लागेल अशा कामांमध्ये हटकून महिला पोलिसांना टाळले जाई. स्वाभाविकच एकूण संख्येतील तब्बल तीस टक्के मनुष्यबळ एकतर वाया जाई किंवा कमअस्सल कामाला जुंपले जाई. यातून उर्वरित कर्मचाऱ्यांवरील ताण तर वाढेच; शिवाय जबाबदारीच मिळत नाही म्हटल्यावर मग काही महिला अशी कामे मिळालीच तर टाळू लागत. वायरलेस विभागात सर्वाधिक महिला का, याची कारणे अशी पुरुषी मानसिकतेत सापडतात. नाशकात ही कोंडी फोडण्यात यश आले.

गेल्या शनिवारी शहरातील सर्व तेरा पोलिस ठाण्यांचा कारभार महिलांनी मोठ्या हिकमतीने सांभाळला. स्टेशन डायरी लिहिणे, रायटर म्हणून काम पाहाणे, तपासात सहभागी होणे अशी वेगवेगळ्या स्वरुपाची कामे यापुढे त्यांच्याकडे येणार आहेत. पोलिस दलात मुख्य प्रवाहातील कामे आपणही सांभाळू शकतो असा आत्मविश्वास यानिमित्ताने त्यांना येईल यापुढे शंभर टक्के जबाबदारी घेत या महिला खऱ्या अर्थाने स्त्री शक्तीचा जागर करतील!