काश्मिरातील मुस्लिम युवतींभोवतीचा फास आवळला गेलाय. काश्मिरी कन्या झहिरा वासीमला नव्या आखाड्यात उतरावे लागले. वेधक कथा आणि परिणामकारक मांडणीमुळे लोकप्रिय ठरलेल्या 'दंगल' मध्ये कुस्तीपटू गीता फोगटची भूमिका झहिराने साकारली. झहिरा रोल मॉडेल असल्याचे मत आमीर खान, जावेद अख्तर, ओमर अब्दुल्लांपासून मुख्यमंत्री मेहबूबा मुफ्तींपर्यंत अनेकांनी व्यक्त केले. आपल्या लक्ष्याकडे लक्ष दे, कोण काय म्हणतंय याची चिंता करू नकोस, असा सल्ला तिला कुस्तीपटू फोगट भगिनींनीदेखील दिला. लढ्याचा अभिनय आणि प्रत्यक्षातील लढा यातील अंतराची जाणीव कदाचित झहिराला झाली असेल. मुख्यमंत्री मेहबूबा मुफ्तींच्या भेटीची माहिती सोशल मीडियावरून प्रसारित करणे तिला महागात पडले. काश्मिरातील मुफ्तीविरोधी गटांनी तिच्यावर टीकेचा भडीमार केला. माझे वय अवघे सोळा आहे, त्यामुळे मला माफ करा, असे या गुणी अभिनेत्रीला म्हणावे लागणे हा आपल्या देशातील सहिष्णुतेचा पराभवच नाही का? अशी आक्रमक मंडळी फक्त एका बाजूला नाहीत. सर्व ठिकाणच्या आणि सर्व प्रकारच्या कट्टरांचे दुखणे समानच असते. त्यांच्या रुसण्यासाठी व्यक्तिगत टीकेची गरज नसते. समाजातील शुभवर्तमान त्यांना कधी खटकेल, हेही सांगता यायचे नाही. झहिराला इशारे आणि धमकी देणारे याच पठडीतील आहेत. तिला मिळालेल्या गर्भित धमक्यांनी काही गट आनंदले असतील. परदेशात मुस्लिम महिलांच्या आक्रमक कथा पडद्यांवरून झळकत असताना किशोरवयीन झहिराच्या निमित्ताने वाट्याला आलेली काश्मिरी संत्रस्तता देशाचे पाऊल मागे नेणारी आहे. रुपेरी पडद्यावरील धाडसी मुलीला चारीमुंड्या चीत करण्यासाठी अनेक धार्मिक ठेकेदार टपलेले असतात. शिक्षण, प्रगती आणि सर्वांगीण विकासाच्या संकल्पनांना छेद देण्याचे प्रयत्न सतत होत असतात. झहिराची संभ्रमावस्था संपवायची असेल तर मुस्लिम समाजातून तिला जोरदार पाठिंबा मिळायला हवा. अन्यथा चित्रपटाबाहेरील वादविवादाची दंगल थांबणार नाही. समाजसेविका रुबिना पटेल यांनी परवा संक्रांतीला एक चांगला प्रयोग केला. नागपुरातील मुस्लिम युवतींना पतंगबाजी करायला त्यांनी प्रेरित केले. आयुष्याच्या आनंदी वाटा स्वीकारणे, हा तुमचाही अधिकार असल्याचे संकेत त्यांनी या उपक्रमामधून दिले. असे उपक्रम सर्वव्यापी झाले तर मुस्लिम मुलीही निश्चितच 'धाकड' बनतील.
धाकड बन ग बाई!
काश्मिरातील मुस्लिम युवतींभोवतीचा फास आवळला गेलाय. काश्मिरी कन्या झहिरा वासीमला नव्या आखाड्यात उतरावे लागले. वेधक कथा आणि परिणामकारक मांडणीमुळे लोकप्रिय ठरलेल्या 'दंगल' मध्ये कुस्तीपटू गीता फोगटची भूमिका झहिराने साकारली.
Maharashtra Times 18 Jan 2017, 2:42 am