अपूर्वाई

अभिनव बिंद्राने बीजिंग ऑलिम्पिकमध्ये सुवर्णपदक जिंकल्यानंतर भारतातील असंख्य तरुणांना नेमबाजीची प्रेरणा मिळाली. १० मीटर एअर रायफल प्रकारात खेळणारी अपूर्वी चंडेला ही त्यातलीच एक. आपण अभिनवप्रमाणे कधीतरी सुवर्णपदक जिंकू, असे स्वप्न तिने पाहिले होते. हीच अपूर्वी आज १० मीटर एअर रायफलच्या जागतिक मानांकन यादीत पहिल्या क्रमांकावर पोहोचली आहे. जवळपास पाच वर्षांपूर्वी अपूर्वीने हेगला झालेल्या एका स्पर्धेत चार पदके जिंकली, त्यावेळी तिचा आदर्श असलेला अभिनवही तिच्यासोबत त्या स्पर्धेत होता. त्यानंतर तिच्या कामगिरीचा आलेख सातत्याने उंचावत राहिला आहे. फेब्रुवारीत वर्ल्डकपमध्ये तिने सुवर्णपदक जिंकले होते. २५२.९ अशी विक्रमी गुणांची नोंद तिने केली होती. २०२०च्या टोकियो ऑलिम्पिकसाठीही तिने १० मीटर एअर रायफलमध्ये भारताचे स्थान पक्के केले आहे. चार वर्षांपूर्वी झालेल्या रिओ ऑलिम्पिकमध्येही ती सहभागी झाली. पण तिला अपेक्षित यश मिळाले नाही. लागोपाठ दोन राष्ट्रकुल क्रीडास्पर्धांत तिने पदके जिंकली. गेल्या वर्षी झालेल्या जकार्ता आशियाई क्रीडा स्पर्धेत तिने सांघिक ब्राँझपदक जिंकले. मात्र, बीजिंगमध्ये झालेल्या वर्ल्डकपमध्ये तिचे पदक थोडक्यात हुकले.

२०१२मध्ये ती राष्ट्रीय विजेती ठरली. मूळची जयपूरची असलेली अपूर्वी ही नेमबाजीकडे वळली तेव्हा तिचे वडील कुलदीपसिंग यांना ती या खेळात नक्कीच काहीतरी करून दाखवू शकते, असा विश्वास वाटू लागला. अपूर्वीने समाजशास्त्रात पदवी घेतली आहे आणि तिला वाचनाची खूप आवड आहे. लेखक पाऊलो कोएलोची ती चाहती आहे. जगात अव्वल ठरल्यानंतर ट्विटरवर प्रतिक्रिया देताना तिने हा कारकीर्दीतील मैलाचा दगड ठरल्याचे म्हटले आहे. असे अनेक मैलाचे दगड तिच्या वाटचालीत येतील अशी अपेक्षा आहे.