बापसे बेटी सवाई

अवनी लवासा

‘बापसे बेटी सवाई’ ही म्हण अवनी लवासा यांना लागू होते. वडिलांना अपेक्षित असलेली कारवाई होऊ शकली नसली तरी कर्तव्यदक्ष अधिकाऱ्याचा प्रभाव काय असू शकतो हे दाखविण्याची संधी अवनी यांना मिळाली. प्रसारमाध्यमांच्या प्रतिनिधींना लिफाफ्यातून पैसे दिल्याचा आरोप जम्मू-काश्मिरातील भाजप नेत्यांवर अलीकडेच झाला. लडाख भागातल्या या प्रकाराच्या थेट चौकशीचे आदेश ज्यांनी दिले त्या लेहच्या निवडणूक अधिकारी म्हणजेच अवनी लवासा. तीन तक्रारी आल्यानंतर स्वत: अवनी यांनी कोर्टात एफआयआर दाखल करण्यात पुढाकार घेतला.

अशा खंबीरपणाचा वारसा त्यांना घरातच मिळाला. वडील निवडणूक आयुक्त अशोक लवासा यांची छबी कर्तबगार व प्रामाणिक अधिकारी अशी आहे. माध्यम प्रतिनिधींना पैसे देण्याचे प्रकरण आचारसंहितेचे उल्लघन तर आहेच पण गुन्हेगारी स्वरुपाचे आहे, असे मत अवनी यांनी व्यक्त केले. अवनी यांनी २०१७ मध्ये लेहच्या उप निवडणूक अधिकारी म्हणून कार्यभार स्वीकारला. त्यापूर्वी त्या उधमपूरला अतिरिक्त उपायुक्त होत्या. सियाचिनच्या दौऱ्यावर असताना राष्ट्रपती कोविंद यांच्याशी त्यांची भेट झाली. राष्ट्रपतींनी नंतर विशेष ट्विट करून त्यांचे अभिनंदन केले. निवडणूक कायदे राबविताना कुठलीही सूट नाकारणाऱ्या अधिकारी म्हणून लोक त्यांचे नाव घेतात. आचारसंहितेचे उल्लंघन केल्याबद्दल नरेंद्र मोदी यांच्यावर आतापर्यंत आठ आक्षेप नोंदविण्यात आले. या सर्व प्रकरणांत मोदींना क्लीन चिट देण्यात आली. अशोक लवासा यांनी या सरसकट निर्दोषत्वाला हरकत घेतली. पंतप्रधानांना किमान औपचारिक पत्र पाठवू असे त्यांचे मत होते. पंतप्रधानांच्या भाषणांची चौकशी करणाऱ्या समितीतील त्यांचे मत अन्य आयुक्तांनी मात्र नाकारले. हीच निर्भयता अवनी यांच्या वर्तणुकीतून झळकते आहे. कर्तव्यनिष्ठेचा मार्ग कोणत्याही अडचणी रोखू शकत नसल्याचे संकेत अवनी यांनी यातून दिले आहेत.