संवेदनशील : गौतम गंभीर

“माझ्या पाठिशी असेलल्या तोफेमुळे चिंतीत होऊ नका, मला घरी रोजच फायर केले जाते”…ही होती पद्मश्री पुरस्कार स्वीकारल्यानंतर पत्नीसोबतचे राष्ट्रपती भवनातील छायाचित्र ट्विट करताना गंभीर गौतमने केलेली मिश्किल टि्वप्पणी. “वो आजभी जिंदा है, तुझमे में, मुझमें , वो आझाद परिंदा है…” असे म्हणत काल तो भगतसिंगांना श्रद्धांजली देण्यास विसरला नाही.

भाजपात प्रवेश करताच विकिपिडियात त्याच्या परिचयापुढे भारतीय राजकारणी आणि माजी क्रिकेटपटू असे बिरुद लागले. गौतमने क्रिकेटमध्ये नाव कमावले. मामा पवन गुलाटीला तो गुरुस्थानी मानतो. त्याला अर्जुन पुरस्कारही मिळाला. सलामीची डावखुरी फलंदाजी करणाऱ्या गौतमला बिकट प्रसंगी कोणता पवित्रा घ्यावा हे सांगावे लागत नाही. तो ३७ वर्षांचा आहे. नव्या खेळाडूंच्या उदयाने क्रिकेटमधील त्याचे स्थान अनिश्चित झाले होते. राजकीय टोलवाटोलवीच्या क्षेत्रात उतरण्यामागे कदाचित भूतकाळातील मैदानी अनुभव असावा. परिश्रमाने पुढे आलेला चिवट फलंदाज म्हणून त्याची ख्याती आहे. तो स्वत:साठी नाही तर देशासाठी खेळतो, हे त्याचे प्रशिक्षक संजय भारद्वाज यांचे मत आहे. मैदानावर असेतो तो योद्ध्यासारखा लढला. मध्यंतरी त्याच्या वक्तव्यावर कर्णधार कोहलीला अप्रत्यक्ष उत्तर द्यावे लागले. ‘कोण काय बोलतो हे मनावर घेतले तर क्रिकेट सोडून घरी बसावे लागेल’ असे कोहलीचे वाक्य होते. गौतम आता राजकारणात दाखल झालाय. त्याने कोहलीचा सल्ला गंभीरतेने घेतलेला बरा. तसेही जनतेचे बोल मनाला लावून घेणाऱ्याला राजकारणात स्थान नसते. दिल्लीकडून क्रिकेट खेळलेल्या गौतमने आयपीएलमध्ये ‘कोलकाता नाईट रायडर्स’ आणि ‘दिल्ली डेअरडेव्हील्स’ची सूत्रे सांभाळली. खेळ छान झाला नाही म्हणून पगार घेणार नाही, असा पवित्रा त्याने दिल्ली डेअरडेव्हीलचा कर्णधार असताना घेतला होता. हीच संवेदना तो पुढेही कायम राखतो का, हे कळेलच!