एकात्म ध्येय

वैयक्तिक छंदाला सामाजिक स्वरूप देण्याचा प्रघात नवा नाही. पण त्यापलीकडे ‘वसुधैव कुटुंबकम्..’ अशा व्यापक ध्येयासाठी जिवाचे रान करणारी माणसे अपवादानेच. ‘के २ के : श्रीनगर ते कन्याकुमारी’ हे तब्बल पावणेचार हजार किलोमीटर अंतर अवघे १० दिवस आणि १० तासांत पूर्ण करणारे सायकलिस्ट महाजन बंधू यांनी नाशिकचा झेंडा गिनीज बुकात रोवला. भारताच्या उत्तर दिशेकडून दक्षिण दिशेकडे सर्वाधिक वेगवान सायकल प्रवास या प्रकारात या मोहिमेची नोंद गिनीज बुकने नुकतीच घेतली. विशेष म्हणजे, ‘तंबाखूमुक्ती’ आणि ‘खेलो इंडिया’ या ध्येयांसाठी ही मोहीम असल्याने सामाजिक भान जपण्याचं कोंदण या पराक्रमास आहे. विशेष आव्हानात्मक मोहिमा काढणाऱ्या महाजन बंधूंची खासियत म्हणजे हे दोघेही डॉक्टर आहेत. डॉ. हितेंद्र हे भूलतज्ज्ञ, तर डॉ. महेंद्र हे डेंटिस्ट. अनेकदा जुळ्या भावंडांचेही व्यक्तिमत्त्व परस्परभिन्न असते. हे महाजन बंधू जुळे नसले तरी त्यांचा हा छंद आणि वेड परस्परांशी नेमके जुळणारे आहे.
यापूर्वीही ‘रेस ऑफ अमेरिका’ ही अतिशय खडतर मानली जाणारी स्पर्धा जिंकून त्यांनी इतिहास घडविला आहे. अगोदर केवळ व्यायाम प्रकार म्हणून सुरू झालेले त्यांचे हे सायकलवेड देशांतर्गत मोहिमांद्वारे सामाजिक संवेदनेत रूपांतरित झाले अन् या सामाजिक जाणिवेने आता देशांच्या सीमांपलीकडची मानव कल्याणाची आगळी गुढी गिनीज बुकातील नोंदीमुळे उभारली गेली. डॉक्टरी पेशात समाजसेवेची संधी असली तरी ही अनवट वाट निवडून तिच्यासाठी शरीर अन् आत्म्याच्या ध्येयाची सांगड घालण्याचे काम महाजन बंधू जोमाने करू शकले. यामागे कारणही तसेच असावे. या दोघांची शरीरं भिन्न असली तरी आत्मरूपाने हे बंधू एकात्म आहेत. त्यांच्या मोहिमांमधून नेमके हेच प्रकर्षाने जाणवते.