रोहित देव

विदर्भातील विधिज्ञ रोहित देव यांच्या रूपाने महाराष्ट्राला नवे महाधिवक्ता लाभले आहेत. यापूर्वी ज्येष्ठ वकील श्रीहरी अणे व सुनील मनोहर या दोन नागपूरकरांना हा मान मिळाला होता. फडणवीस यांचे निकटवर्ती मानले जाणारे अॅड. देव यापूर्वी सहयोगी महाधिवक्ता म्हणून प्रामुख्याने मुंबई उच्च न्यायालयातच कार्यभार सांभाळत होते. श्रीहरी अणे यांनी पदाचा राजीनामा दिल्यानंतर महाधिवक्ता पदाच्या कार्यभाराची जबाबदारी त्यांच्यावरच आली होती. त्यामुळे मागच्या जवळपास सहा महिन्यांपासून ते मुंबई उच्च न्यायालय तसेच उच्च न्यायालयाच्या नागपूर व औरंगाबाद खंडपीठासमोर राज्य सरकारची बाजू मांडत होते. तत्पूर्वी देव हे नागपूर खंडपीठात केंद्र सरकारचे सहायक सॉलिसिटर जनरल म्हणून कार्यभार पाहत होते.

पाच डिसेंबर १९६३ रोजी जन्म झालेले रोहित देव यांचे वडील बबन देव हे केंद्र सरकारी कर्मचारी होते. त्यामुळे रोहित देव यांचे शालेय शिक्षण गोव्यात झाले आणि नंतर महाविद्यालयीन शिक्षण नागपूरमध्ये झाले. हिस्लॉप महाविद्यालयात उत्तम गुणांनी बी.कॉम.ची पदवी मिळवल्यानंतर त्यांनी नागपूर विद्यापीठाच्या डॉ. आंबेडकर विधी महाविद्यालयात कायदे शिक्षण घेतले. ही पदव्युत्तर पदवी मिळवताना कंपनी व हिंदू कायदे आणि कायद्यांचा अन्वयार्थ या विषयांत त्यांनी सुवर्णपदके मिळवली. चार सप्टेंबर १९८६ रोजी अॅडव्होकेट म्हणून नोंदणी केल्यानंतर त्यांनी नागपूर खंडपीठामध्ये आपली वकिली सुरू केली. सुरवातीला अॅड. सुबोध धर्माधिकारी यांच्या मार्गदर्शनाखाली वकिली केल्यानंतर १९९०पासून त्यांनी स्वतंत्रपणे वकिली सुरू केली. त्यात त्यांनी अनेक दिवाणी व घटनात्मक विषयांचे तसेच फौजदारी प्रकरणांचे खटले लढवले.

तत्कालीन काँग्रेस आघाडी सरकारने भाजपच्या ताब्यात असलेली नागपूर महापालिका बरखास्त केल्यानंतर ते प्रकरण उच्च न्यायालयात पोचल्यावर देव यांनीच देवेंद्र फडणवीस यांच्या सहकार्याने राज्य सरकारच्या विरोधात यशस्वीपणे किल्ला लढवला होता. देव यांनी अनेक वर्षे राज्य सरकारसाठी विक्रीकर विभागाकरिला विशेष सरकारी वकील म्हणून काम पाहिले. नागपूरमधील २५० महाविद्यालयांवरील बंदीच्या प्रकरणात नागपूर विद्यापीठासाठीही विशेष वकील म्हणून काम पाहिले. उत्तम कायदेशीर दृष्टी आणि त्याचबरोबर मृदु स्वभाव, अभ्यासू वृत्ती आणि कामातील प्रामाणिकपणा व सचोटी हे अॅड. रोहित देव यांचे गुण आहेत. त्यांचे बंधू एअर मार्शल शिरीष देव हेसुद्धा भारतीय हवाई दलात एअर ऑफिसर कमांडिंग इन चीफ (वेस्टर्न कमांड) हे पद भूषवत आहेत. त्यांच्या नावाचीही भारतीय हवाई दल उपप्रमुख म्हणून नुकतीच घोषणा झाली आहे.