यंदाच्या पद्मश्री सन्मानात झळकलेले आणखी एक नाव म्हणजे मुरलीकांत पेटकर. पॅराऑलिंपिक स्पर्धेत भारताला पहिले सुवर्णपदक मिळवून देणाऱ्या पेटकर यांच्या या सन्मानाने एका वीरसैनिकाचा, जिद्दी खेळाडूचा आणि प्रेरक व्यक्तिमत्वाचा गौरव झाला आहे. प्रतिकूल परिस्थितीवर मात करून अथक परिश्रम करीत, जिद्दीने स्वत:चे आयुष्य घडविणारे पेटकर यांचा जीवनप्रवास प्रेरणादायी आहे. १९७२मध्ये जर्मनीतील हायडेलबर्ग येथे झालेल्या पॅराऑलिंपिक स्पर्धेत वैयक्तिक सुवर्णपदक मिळविणाऱ्या पेटकर यांचा जन्म इस्लामपूरचा. घरची परिस्थिती गरिबीची. लहानपणापासूनच त्यांना कुस्तीची आवड होती. मात्र, परिस्थितीमुळे त्यांना कुस्तीचा शौक पुरविणे शक्य झाले नाही. पुढे ते सैन्यात दाखल झाले. तिथे त्यांच्यातील खेळाडूला वाव मिळाला. कुस्ती, बॉक्सिंग आदी खेळांत त्यांनी प्रावीण्य मिळविले. रणांगणावरही त्यांनी पराक्रम गाजविला. १९६५च्या पाकिस्तानविरुद्धच्या युद्धात त्यांना सात गोळ्या लागल्या. त्यांच्यावर लष्करी रुग्णालयात ते तब्बल दोन वर्षे मृत्यूशी झुंज देत होते. बरोबर दोन वर्षांनी त्यांना शुद्ध आली; परंतु कमरेखालील शरीर लुळे पडले होते. मात्र, या परिस्थितीवर त्यांनी जिद्दीने मात केली. व्हीलचेअरवर बसून ते फिरते झाले. विविध प्रकारचे व्यायाम ते करू लागले आणि त्यांच्या पायात शक्ती येऊ लागली. त्यानंतर ते अपंगांसाठीच्या क्रीडा स्पर्धांत भाग घेऊ लागले. वेट लिफ्टिंग, गोळाफेक, भालाफेक, नेमबाजी आदी विविध स्पर्धांत त्यांना यश मिळत गेले. राष्ट्रीय स्तरावर त्यांचे नाव झाले आणि १९७५मध्ये त्यांना छत्रपती पुरस्कार मिळाले. त्यानंतर विविध देशांमधील क्रीडा स्पर्धांत ते भाग घेऊ लागली. हाँगकाँग, ब्रिटन, कॅनडा, जपान, अमेरिका आदी विविध देशांतील अपंगांसाठीच्या क्रीडा स्पर्धांत त्यांनी भाग घेतला आणि पदकांची अक्षरश: लयलूट केली. पोहोण्यामध्येही त्यांनी नैपुण्य प्राप्त केले आणि त्याच्या स्पर्धेतही यशस्वी झाले. ५० मीटर फ्री स्टाइल पोहोण्याच्या स्पर्धेत त्यांनी स्वत:चच विक्रम मोडला. रणांगणावर आणि मैदानावर झुंज देणाऱ्या पेटकरांनी नव्या खेळाडूंसाठी प्रोत्साहन देण्यासाठी सावित्रीबाई फुले पुणे विद्यापीठाशी संलग्न त्यांनी फिरती ढाल ठेवली. त्यांच्यासारख्या कर्तृत्ववान वीराचा आणि खेळाडूचा सन्मान सर्वांनाच प्रेरणा देणारा आहे.
मुरलीकांत पेटकर
यंदाच्या पद्मश्री सन्मानात झळकलेले आणखी एक नाव म्हणजे मुरलीकांत पेटकर. पॅराऑलिंपिक स्पर्धेत भारताला पहिले सुवर्णपदक मिळवून देणाऱ्या पेटकर यांच्या या सन्मानाने एका वीरसैनिकाचा, जिद्दी खेळाडूचा आणि प्रेरक व्यक्तिमत्वाचा गौरव झाला आहे.
Maharashtra Times 3 Feb 2018, 2:56 am