उर्मिला मातोंडकर
काही वर्षांपूर्वीपर्यंत विविध भूमिकांतून आपला ठसा उमटवणारी अभिनेत्री उर्मिला मातोंडकर आता राजकीय प्रवासाला निघते आहे. काँग्रेसमध्ये जाताना भाजपच्या धोरण व कामगिरीवर ताशेरे ओढत तिने आपली भूमिका मांडली आहे. सिने कलावंतांनी राजकारणात येण्याची परंपरा नवी नाही. त्यांच्या रुपेरी पडद्यावरील लोकप्रिय प्रतिमेचा फायदा घेण्यासाठी राजकीय पक्ष उत्सुक असतातच. मात्र, असे कलावंत आपले स्वतंत्र नेतृत्व सिद्ध करतात की केवळ शोभेचे बाहुले होतात, हे काळ ठरवतो. आपल्याकडे दोन्ही प्रकारची उदाहरणे आहेत. उर्मिला मातोंडकर या दोन्हींपैकी कोणत्या गटात जातात, हे लवकरच कळेल. लहानपणीच चित्रपटसृष्टीत नाव कमावणाऱ्या उर्मिलाने आरंभी मराठीत आणि नंतर प्रामुख्याने हिंदी चित्रपटांमधून कारकीर्द गाजवली.
बालकलाकाराचे वय ओलांडल्यावर तिने आधी मल्याळममध्ये आणि नंतर हिंदीत यशस्वी चित्रपट दिले. ‘नरसिंहा’पासून सुरू झालेला तिचा प्रवास पुढे रामगोपाल वर्मा यांच्या ‘रंगिला, भूत, कौन, सत्या’ या विविध जातकुळीच्या चित्रपटांमधून पुढे जात राहिला. ‘जुदाई, एक हसिना थी’ यासारख्या स्त्रीप्रधान चित्रपटांतूनही तिने नाव कमवले. या काळात तिने तेलगु आणि तमिळ चित्रपटांतूनही लक्षणीय भूमिका केल्या. त्यानंतर उर्मिलाने कलात्मक चित्रपटांकडे मोहरा वळवला. तेथेही ‘पिंजर, नैना, मैने गांधी को नही मारा’ आदी चित्रपटांतून आपली वेगळी ओळख पटवून दिली. करिअरच्या या विविध टप्प्यांमधील बदलांना सामोरे जाताना तिने दाखवलेली चिकाटी तिला आता तिच्या राजकारणाच्या वाटेवर उपयोगी पडेल. राजकारण हे काही एका निवडणुकीपुरते नसते. उर्मिलाचे पती मोहसीन अख्तर मीर हे काश्मिरी उद्योजक व मॉडेल असले तरी तिला राजकारणाचा वारसा घरातून मिळाला आहे. तिचे वडील समाजवादी परिवारातले व जॉर्ज फर्नांडिस यांचे निकटचे सहकारी. हा वारसा उर्मिला कसा पुढे नेते हे आता कळेलच.