आदित्य पुरी यांच्यानंतर एचडीएफसी बँकेच्या नेतृत्वाची धुरा त्याच संस्थेत तीन दशकांची कारकीर्द असलेल्या शशिधर जगदीशन यांच्याकडे आल्यामुळे एक अनिश्चितता संपली आहे. मुंबई विद्यापीठात भौतिकीत पदवी, पुढे शेफिल्ड विद्यापीठात वित्त आणि बँकिंगचे पदव्युत्तर शिक्षण घेतलेले जगदीशन एचडीएफसी बँकेत आदित्य पुरी यांच्यानंतर दोन वर्षांनी आले. ते सध्या बँकेचे अतिरिक्त संचालक आहेत. त्यांच्याखेरीज त्यांचे वरिष्ठ सहकारी कैझाद भरूचा आणि सिटी बँकेचे सुनील गर्ग यांचीही या पदासाठी शिफारस करण्यात आली होती. आपला वारस बाहेरचा नसेल, असे पुरी अलीकडेच सूचित केले होते. त्यानुसार, अनुभवी जगदीशन यांना हे पद मिळाल्याने, अनेक गोष्टी सुरळीत झाल्या आहेत. त्यांनी संस्थेतील वित्त, मनुष्यबळ, कायदा, प्रशासन, पायाभूत सुविधा, कार्पोरेट कम्युनिकेशन; तसेच सीएसआर आदी विभाग सांभाळले आहेत. एचडीएफसीचे रोखे पावणेचार टक्क्यांनी वधारल्याने, बाजारानेही त्यांच्या नियुक्तीवर सकारात्मकता व्यक्त केली आहे. आता त्यांच्यावर वाढत्या अपेक्षांचा ताण असेल. पुरी यांनी २६ वर्षांच्या कारकिर्दीत, बँकेच्या भागधारकांना अडीचशेपट, म्हणजे २५,००० टक्के परतावा दिला आहे. त्याच्या तुल्यबळ कामगिरी करण्यासाठी जगदीशन यांच्यावर बाजाराचा आणि संस्थांतर्गत दबाव असेल. त्याचबरोबर सध्या करोनामुळे घसरलेला किरकोळ कर्जांचा गड त्यांना प्राधान्याने सर करावा लागणार आहे; मात्र ही कारकीर्द दीर्घ पल्ल्याच्या दृष्टीने पाहायला हवी. सध्या आपण केवळ ऑक्टोबरनंतर एचडीएफसी बँकेचे नवे पर्व सुरू होईल, एवढेच म्हणू शकतो.
परिचित नेतृत्व: शशिधर जगदीशन
आदित्य पुरी यांच्यानंतर एचडीएफसी बँकेच्या नेतृत्वाची धुरा त्याच संस्थेत तीन दशकांची कारकीर्द असलेल्या शशिधर जगदीशन यांच्याकडे आल्यामुळे एक अनिश्चितता संपली आहे.
महाराष्ट्र टाइम्स.कॉम 5 Aug 2020, 9:37 am