भारतातील उच्चभ्रू वर्गातील महिलांनी साडी वापरणे म्हणजे मागासलेपणाचे, परंपरावादी विचारांचे लक्षण मानले जात असतानाच्या काळात, त्याच साडीला 'स्टेटस सिम्बॉल' बनवणाऱ्या सत्य पॉल यांचे नुकतेच ७८व्या वर्षी निधन झाले. साडीबद्दलचा परंपरागत विचार बदलवून पॉल यांनी 'डिझायनर साडी' नावाची संकल्पना भारतीय महिलांच्या मनात रुजविली. देशातील पहिले साडी बुटीक त्यांचेच. आज प्रचलित असलेल्या पोल्का डॉट, झेब्रा प्रिंटवर त्यांनी त्या काळात लोकप्रिय ठरलेले प्रयोग केले. साडीवर सिरीलीक स्क्रिप्ट, जपानी कॅलिग्राफी, दिग्गजांची चित्रेही वापरली. लक्षवेधक, अफलातून आणि वैविध्यपूर्ण, ही पॉल यांच्या डिझाइनची प्रमुख वैशिष्ट्ये होती. नव्याची आवड असलेल्या भारतीय महिलांना साडीत झालेले हे बदल भावले. साडी 'फॅशन स्टेटमेंट' झाली. सध्याच्या पाकिस्तानातील लयाह जिल्ह्यात १९४३मध्ये जन्मलेले पॉल, फाळणीनंतर कुटुंबीयांसह दिल्लीत आले. शिवणकलेचे कुठलेही शिक्षण त्यांनी घेतलेले नव्हते; मात्र शाळेत असल्यापासून स्वत:चे आणि मित्रांचे कपडे शिवण्याची त्यांना अतोनात आवड होती. हीच आवड पुढे त्यांच्या आयुष्याचा अविभाज्य भाग बनली. २५व्या वर्षी पॉल यांनी 'हॅण्डलूम एम्पोरियम' नावाने कापडाचे दुकान सुरू केले. लवकरच कापड व्यापारात त्यांचा जम बसला. काही काळातच त्यांच्या दुकानातील कापडाची युरोप आणि अमेरिकेमध्ये निर्यात सुरू झाली. पद, पैसा आणि प्रतिष्ठा पायाशी लोळण घेत असताना, वयाच्या केवळ ४०व्या वर्षी ऐन बहरात आलेला व्यवसाय आपल्या भावांकडे सोपवून, पॉल हे कुटुंबीयांसह आचार्य रजनीश यांच्या अमेरिकेतील आश्रमात निघून गेले. तिथून परत आल्यानंतर पॉल यांनी अमेरिकेतील फॅशनची जोड भारतीय साड्यांना दिली. चार दशकांपेक्षा अधिक काळ सत्य पॉल भारतातील फॅशन जगताच्या सर्वोच्च वर्तुळात वावरले. त्याचवेळी त्यांचा अध्यात्माकडे ओढा कायम राहिला. फॅशन क्षेत्रातील या दिग्गजाने शेवटचा श्वास घेतला तो कोइम्बतूरमधील ईश योग केंद्रात. मायावी दुनियेत राहूनही विरक्त वृत्ती जोपासणे फारच थोड्या लोकांना जमते. सत्य पॉल अशाच अवलियांपैकी एक होते.