ललिता केंकरे यांना नाट्य व कलाप्रेमाचा जसा पैतृक वारसा मिळाला, तसा विवाहानंतरचा प्रवास दामू केंकरे यांच्यासारख्या चतुरस्र नाट्यकर्मीसोबत झाला. मुंबई साहित्य संघाच्या नाट्यशाखेचे एक आधारस्तंभ तात्या आमोणकर हे ललिताबाईंचे वडील; त्यामुळे ललिता आणि सुधा (करमरकर) या भगिनी अल्लड वयातच रंगभूमीवर बेलाशक बागडल्या असतील, तर नवल नाही. तात्यांना आपल्या लेकींना यथोचित, शास्त्रशुद्ध कलाशिक्षण द्यावयाचे होते. म्हणूनच ललिता या गायन, नाट्य आणि नृत्य या तिन्ही कलांचे औपचारिक शिक्षण घेण्यासाठी वडिलांचे बोट धरून दिग्गज कलावंतांच्या गुरूकुलांमध्ये गेल्या. या गुरुवर्यांमध्ये कला अकादमी चालविणारे पार्श्वनाथ आळतेकर होते, तसे नर्तनगुरू पार्वतीकुमारही होते. गायनगुरू पंडित गोविंदराव अग्नीही होते. पुढे ललिताबाईंनी संगीत नाटक, गद्य नाटके, लोकनाट्ये, मराठी किंवा हिंदी चित्रपट, मालिका या सर्वच प्रकारांमध्ये ज्या सहजतेने आणि काळाशी सुसंगत अशा अभिनय शैलीने कामे केली, त्या साऱ्यांचे मूळ या चौफेर प्रशिक्षणात होते. दामू केंकरे यांच्या पत्नी किंवा अभिनेते विजय यांच्या आई इतकीच त्यांची ओळख नव्हती. साहित्य संघ, सुधा करमरकर, दामू केंकरे यांच्या निर्मितीत त्या सहजतेने सहभागी होत. ते घरचेच कार्य असे; पण सई परांजपे यांचा 'कथा' चित्रपट असो किंवा श्याम बेनेगेल यांची 'यात्रा' ही मालिका असो, ललिताबाईंनी त्यात अभिनयाचा ठसा उमटविला. 'संगीत सौभद्र', 'तुझे आहे तुजपाशी', 'पती गेले गं काठेवाडी' ही नाटकांची नावे त्यांचे अष्टपैलूत्व सांगण्यास पुरेशी आहेत. ललिता केंकरे यांना श्रद्धांजली!
अष्टपैलू कलावती : ललिता केंकरे
ललिता केंकरे यांना नाट्य व कलाप्रेमाचा जसा पैतृक वारसा मिळाला, तसा विवाहानंतरचा प्रवास दामू केंकरे यांच्यासारख्या चतुरस्र नाट्यकर्मीसोबत झाला.
महाराष्ट्र टाइम्स 31 Jul 2020, 5:55 am