प्रदूषण टाळण्याचा संदेश

सध्या अनेक ठिकाणी वृक्षतोड होत असताना किल्ल्यांवरची हिरवाई मात्र बऱ्याच अंशी टिकून आहे. किल्ल्यांचं वैभव जपण्यासाठी ‘रानवाटा..ध्यास महाराष्ट्राचा’ हा ग्रूप प्रयत्न करतोय. किल्ले संवर्धन करत असतांना त्यांना प्रदूषणमुक्त करण्यासाठी स्वप्नील पवार आणि ‘रानवाटा’चा ग्रूप कार्यकरत आहे.

स्वप्नील पवारला मुळात फोटोग्राफीची आवड आहे. हरिश्चंद्र गडावर त्याला फोटो काढायला खूप वाव मिळाला. फोटो काढतांना खटकले ते प्लास्टिक प्रदूषण. प्लास्टिकच्या पिशव्या, बाटल्या आणि कप यामुळे गड परिसरात असलेल्या परिसंस्थेला हानी पोहोचते. याचा परिणाम कळत-नकळतपणे पर्यावरणावर होतो. प्लास्टिक कचऱ्यामुळे झाडांपर्यंत जाणारं पाणी अडतं. पर्यावरण रक्षणासाठी प्लास्टिक प्रदूषण टाळण्याची गरज असल्याचं स्वप्नील पवार सांगतो. त्यामुळे ‘रानवाटा’चा ग्रूप दरवर्षी पावसाळ्यापूर्वी प्लास्टीक स्वच्छता मोहीम राबवतो. तसंच शक्य त्या ठिकाणी बिया रुजवणे, छोटी रोपटी लावण्याचं काम ते करतात.

यंदा मे महिन्यात स्वप्निल पवार, राधेश तोरणेकर, देवेषु ठाणेकर आणि ‘रानवाटा’ टीमने हरिश्चंद्र गडावर आठवड्याभराची स्वच्छता मोहीम राबविली. या आठवड्याभरात मंगळगंगा नदीच्या पात्रातला इतर कचरा आणि प्लास्टिक कचरा त्यांनी साफ केला. गणेश गुहेच्या बाहेरच्या दारूच्या बाटल्या बाहेर काढल्या. केदारेश्वर लेण्यातले पाणी आणि गाळ तब्बल ४० वर्षांनी ‘रानवाटा’च्या टीममुळे उपसला गेला. गावकऱ्यांच्या मदतीने स्टीलच्या बादल्यांनी हजारो लिटर दूषित पाणी बाहेर काढून पर्यावरणास घातक पाणी प्रदूषण कमी केले. याच बरोबर गडावरील गणेश गुहेच्या बाजूची दोन पाण्याची टाकी साफ केली.

‘रानवाटा’चा प्रवास ट्रेकिंग, फोटोग्राफी आणि पर्यावरणासाठी काम असा सुरू असल्याचं स्वप्नील पवार सांगतो. यापुढेही ‘रानवाटा’ तर्फे पर्यावरण रक्षणासाठी उपक्रम राबविले जातील, असं स्वप्नील पवार सांगतो.