स्वकीयांकडूनच पराभव

उत्तराखंडमध्ये भाजपला पुन्हा संधी देत मतदारांनी आलटून पालटून कौल देण्याची निकालाची परंपरा कायम राखली. मात्र, उत्तराखंडमधील हरिश रावत यांचा पराभव ‘मूळ काँग्रेसी’ असलेल्या भाजप नेत्यांनी केला, असेच म्हणावे लागेल.

रावत यांच्याविरोधात भाजपचे (यातील काही मुळचे काँग्रेसी) सुमारे अर्धा डझन नेते आखाड्यात उतरले होते. यात भाजपचे माजी मुख्यमंत्री रमेश पोखरियाल (निशंक), भुवनचंद्र खंडुरी, भगतसिंह यांच्यासह काँग्रेसच्या कोट्यातून आणि आपल्या कर्तृत्वामुळे मुख्यमंत्रीपद गमावलेल्या विजय बहुगुणा आणि नारायणदत्त तिवारी यांच्यासह मानव उत्थान समितीच्या माध्यमातून अध्यात्मिक वर्तुळात बडे नाव असलेले सत्पालसिंह महाराज यांचा समावेश होता. या व्यतिरिक्त रंग बदलणाऱ्या सरड्यालाही लाजवेल अशा पद्धतीने काँग्रेस नेते आणि खुद्द हरिश रावत सरकारमधील मंत्र्यांनी रात्रीतून पक्ष बदलला. यात राज्यातील दलित नेते आणि काँग्रेससोबत गेली ४० वर्षे ‘एकनिष्ठ’ असलेल्या यशपाल आर्य, रेखा आर्य या बड्या नेत्यांचाही समावेश होता. यामुळे आत्मविश्वास गमावल्याने रावत यांना धोबीपछाड मिळाला. राज्यात भाजपला स्पष्ट बहुमत असले तरी त्यात मूळ भाजपवासीय किती? असा प्रश्न उरतोच.

गेल्या वेळी एकूण ७० पैकी काँग्रेसला सर्वाधिक ३२ तर भाजपला ३१ जागा मिळाल्या होत्या. बहुमतासाठी काँग्रेसच्या मदतीला बहुजन समाज पक्षाच्या (बसप) तीन आमदारांचे पाठबळ मोलाचे ठरले होते. आता कोणत्याही परिस्थितीत बहुमत मिळवायचेच या इर्षेने पेटून उठलेल्या भाजपने निवडणुकीच्या तोंडावर पक्षात आलेल्या सर्वच जाती धर्माच्या, कलंकित, भ्रष्ट पार्श्वभूमी असलेल्या नेत्यांच्या प्रवेशासाठी पायघड्या घातल्या. यातील ‘निवडून येण्याची क्षमता’ असलेल्यांना तिकीट दिले. या जोरावर भाजप विजयी ठरला. रावत सरकारला खाली खेचल्यानंतर राज्यात भाजपचा चेहरा नेमका कोण राहणार? मुख्यंमत्रीपदी कोण बसणार? यात मूळ भाजप नेत्यांना संधी मिळणार की निवडणुकीच्या तोंडावर काँग्रेस सोडून आलेल्यांच्या गळ्यात माळ घातली जाणार याची उत्सुकता कायम आहे.