भवतालातील वास्तवाच्या कथा
'टर्निंग पॉईंट' हा सुभाष झेंडे यांचा तिसरा कथासंग्रह. या पूर्वीच्या त्यांच्या दोन कथासंग्रहांना वाचकांचा उत्तम प्रतिसाद मिळालेला आहे. कारण त्यांच्या कथा छोटेखानी असल्या तरी नेहमीच त्या तुमची-आमची गोष्ट सांगत आल्या आहेत. म्हणजे त्यांच्या कथा वाचताना ते कथानक आपल्याच आजूबाजूला घडतंय किंवा घडलेलं आहे असं वाटत राहतं. हा नवीन कथासंग्रह वाचतानाही त्याचा अनुभव येतो. या कथा एकप्रकारे वास्तववादी कथाच आहेत. मुख्य म्हणजे त्या कौटुंबिक कथा आहेत. त्यामुळे आपण त्यांत गुंतत जातो. या कथासंग्रहात एकूण दहा कथा आहेत आणि त्या सगळ्याच वाचनीय आहेत. कारण लेखकाची शैली चित्रदर्शी आहे.
टर्निंग पॉईंट/ सुभाष झेंडे / मेहिनीराज प्रकाशन / मुखपृष्ठ : गौरव कुळकर्णी / पृष्ठं : १११ / किंमत : १२० रु.
...
विशुद्ध भावकविता
सध्याची मराठी कविता ही विशिष्ट भूमिकेतून लिहिली जात आहे. परिणामी प्रत्येकाच्या कवितेत त्याचे विचार प्रथम डोकावतात आणि त्यामुळे कवितेची विशुद्धता हरवते. अशा जोखमीच्या काळात प्रज्ञा करडखेडकर यांचा 'ह्या वळणावर' हा कवितासंग्रह प्रकाशित झाला आहे. या संग्रहातील कविता या विशुद्ध भावकविता आहेत. एरव्ही अनेकदा प्रेमकविता ही शब्दबंबाळ होण्याची शक्यता असते. परंतु या संग्रहातील कवितांमध्ये भावनांचा तळ संयतपणे धुंडाळण्यात आला आहे. त्यामुळे या कविता वाचताना कळतनकळत दिवगंत कवयित्री इंदिरा संत यांची आठवण होते. या कविता छोट्या आहेत, परंतु त्यांचा आशय मोठा आहे.
ह्या वळणावर / प्रज्ञा करडखेडकर / संवेदना प्रकाशन / मुखपृष्ठ : पाब्लो पिकासो / पृष्ठं : ९६ / किंमत : १२० रु.
...
एका गावखेड्याची अस्सल गोष्ट
'परीघ' हे सचिन जगदाळे यांचं दुसरं पुस्तक. यापूर्वीचं 'गुलाबराव पारनेरकर' हे त्यांचं पुस्तक विनोदी होतं. मात्र 'परीघ' ही कादंबरी एकदम विरोधी टोकाची आहे. म्हणजे पहिल्या पुस्तकाचा बाज एकदम हलकाफुलका, तर दुसऱ्या पुस्तकात लेखकाने एका बागायतदार खेड्याची कथा रंगवताना ती एवढी अस्सल रंगवली आहे की, त्याच्या सूक्ष्म निरीक्षणशक्तीला दाद द्यावी वाटते. या कादंबरीच्या निमित्ताने मराठी साहित्यात अजून एका दमदार कृषि विषयक साहित्यकृतीची भर पडली आहे. या कादंबरीतली पात्रं, त्यांचं व्यक्तिमत्त्व, गावपरिसर आणि वातावरण लेखकाने अतिशय उत्तमपणे चितारलं आहे. त्यामुळे कादंबरी वाचताना आपणही तिचाच एक भाग होऊन जातो.
परीघ / सचिन जगदाळे / ग्रंथाली / मुखपृष्ठ : सतीश भावसार / पृष्ठं : १३० / किंमत : १५० रु.