शासकीय योजनांची बित्तंबातमी
'शासकीय योजनांचा खजिना' हे डॉ. पुरुषोत्तम भापकर यांच्या संकल्पना व संपादनातून साकारलेलं पुस्तक म्हणजे ग्रामीण भागातील लहान-थोर सगळ्यांसाठी माहितीचा मोठाच खजिना आहे. खरंतर जनतेच्या सोयीसाठी राज्य आणि केंद्र सरकार विविध शासकीय योजना राबवत असतं. परंतु या योजना जनतेपर्यंत नीट पोचतच नसल्यामुळे प्रत्यक्षात जनतेला त्यांचा काहीही उपयोग होत नाही, तर अनेकदा शासकीय सेवेतील मंडळीच फक्त या योजनांचा लाभ उठवतात. या पार्श्वभूमीवर भापकर यांनी संपादित केलेलं हे पुस्तक जनतेसाठी माहितीचं मोठं भांडार आहे. विशेषत: कृषि क्षेत्रात कार्यरत असणाऱ्या शेतकऱ्यांपासून कृषि-व्यावसायिकांपर्यंत साऱ्यांसाठी हे पुस्तक अतिशय उपयुक्त आहे.
शासकीय योजनांचा खजिना / डॉ. पुरुषोत्तम भापकर / साकेत प्रकाशन / मुखपृष्ठ : रविंद्र तोरवणे / पृष्ठं : २७९ / किंमत : २२५ रु.
...
आदर्शवादी जीवनतत्त्वांची मांडणी
सु. श्री. पांढरीपांडे यांचा 'पैशाचा झगा' या ललितलेख संग्रह नावापासूनच बोलका आहे. सध्याच्या काळात प्रत्येकजण पैशाच्या मागे कसा धावत आहे आणि त्यासाठी संस्कारांपासून-विचारांपर्यंत तडजोडी कशा करत आहे, हेच या पुस्तकाचं मुख्य सूत्र आहे. या पुस्तकात एकूण तेरा ललितलेख आहेत. मात्र हे लेख केवळ ललितपर नाहीत, तर ते एकप्रकारे वैचारिक लेख आहेत. लेखनशैली ललित असली, तरी लेखकाने प्रत्येक लेखातून काहीएक आदर्शवादी विचारसरणी वाचकांसमोर ठेवण्याचा प्रयत्न केला आहे. 'भ्रष्टाचाराचा अजगरी विळखा', 'मनोरंजन की मनोभंजन', 'स्त्री सक्षम कशी होईल', 'ययाती की यती'... या काही शीर्षकांतूनच पुस्तकाची आणि त्यातील लेखाची प्रकृती लक्षात येते.
पैशाचा झगा / सु. श्री. पांढरीपांडे / प्रतिमा प्रकाशन / मुखपृष्ठ : रमेश भारताल / पृष्ठं : ११२ / किंमत : १७० रु.
...
सामजिक जाणिवेचे लेख
'जाणिवांचा तळ छेदताना' हे पत्रकार कैलाश म्हापदी यांचं पुस्तक म्हणजे त्यांनी आजवर विविध कारणाने लिहिलेल्या लेखांचं संकलन आहे. वर्तमानपत्रीय लेख अनेकदा दुसऱ्या दिवशी भूतकाळात जमा होतात. कारण त्यांचा संदर्भ मोजक्या काळापुरताच असतो. मात्र या पुस्तकातील कैलाश म्हापदी यांच्या लेखांचं तसं होत नाही. कारण पत्रकारिता करताना त्यांनी हे लेख लिहिलेले असले, तरी त्यामागची त्यांची भूमिका सामाजिक कार्यकर्त्याची होती. साहजिकच लेखातील प्रत्येक प्रश्नाचा विचार त्यांनी व्यापक परिप्रेक्ष्यात केला असल्यामुळे त्यांचे लेख शिळे होत नाहीत. महत्त्वाचं म्हणजे म्हापदी ठाणे जिल्ह्यातील धडाडीचे पत्रकार आणि कार्यकर्ते असल्यामुळे त्यांनी प्रत्येक लेखात अगदी सडेतोड भूमिका घेतलेली आहे. प्रसंगी कठोर टीकाही केली आहे.
जाणिवांचा तळ छेदताना / कैलाश म्हापदी / शारदा प्रकाशन / मुखपृष्ठ : अजय जाधव / पृष्ठं : १२० / किंमत : १०० रु.