अक्षरवेल

खगोलशास्त्राची कवितारूपी ओळख

'आभाळाचे गुपित' हा प्रा. देवबा शिवाजी पाटील यांनी लहान मुलांसाठी लिहिलेला कवितासंग्रह अतिशय महत्त्वाचा आणि मोलाचा आहे. मुलांच्या भावविश्वाचा वेध घेणाऱ्या कविता अनेकजण लिहितात, परंतु देवबा पाटील यांनी मुलांच्या ज्ञानसमृद्ध करणाऱ्या कविता लिहिल्या आहेत. त्यांनी या कवितासंग्रहातून खगोलशास्त्राचा वेध घेणाऱ्या कविता लिहिल्या आहेत. त्या साध्या-सोप्या आहेत, परंतु अवकाशातील आकाशगंगा, सूर्यमाला, चंद्र, सौरडाग, धूमकेतू, कृष्णविवर या संकल्पनांचा वेध घेणाऱ्या आहेत. मुलांना विज्ञानही किती सोपपणाने शिकवता येतं, त्याचं या कविता म्हणजे उत्तम उदाहरण आहेत.

आभाळाचे गुपित / देवबा पाटील / दिलीपराज प्रकाशन / मुखपृष्ठ : संतोष घोंगडे / पृष्ठं : ३५ / किंमत : ९० रु.

...

जगणंच मांडणाऱ्या कविता

प्राचार्य शांताराम पोखरकर यांचा 'ओंजळीतील फुले' हा कवितासंग्रह नुकताच प्रकाशित झालाय. विशिष्ट विषय, किंवा सूत्र घेऊन यातल्या कविता लिहिलेल्या नाहीत, त्यामुळे कवितांमधली विविधता जाणवते. महत्त्वाचं म्हणजे या कवितातील विषय आपल्या रोजच्या जगण्याशी संबंधित आहेत, तसंच ते रोजच्या माणसांशीही संबंधित आहेत. केवळ निसर्गवादी कविता या पुस्तकात नसून, त्या माणसाच्या जगण्याचा थेट तळ धुंडाळणाऱ्या आहेत. त्यामुळेच त्या वाचचानाच मनाचा कब्जा घेतात.

ओंजळीतील फुले / शांताराम पोखरकर / स्नेहवर्धन प्रकाशन / मुखपृष्ठ : संतोष घोंगडे / पृष्ठं : १०३ / किंमत : १३० रु.

...

विविधांगी साहित्याने नटलेला 'वसंत'

बृहन् महाराष्ट्र मंडळाचे १९ अधिवेशन गेले तीन दिवस अमेरिकेतील डलास फोर्टवर्थ इथे सुरू आहे. त्यानिमित्ताने दरवर्षीप्रमाणे यंदाही 'वसंत' मासिकाचा संमेलनविशेषांक प्रकाशित करण्यात आला आहे. डॉ. अनंत लाभसेटवार अतिथी संपादक असलेल्या या विशेषांकात वेगवेगळ्या विषयांवरील कथा-लेखांची मांदियाळी आहे. पुण्यातील बाहुलीच्या हौदापासून ते बोस्टनच्या हार्वर्ड विद्यापीठापर्यंतच्या गोष्टींचा यात समावेश आहे. यातले लिहिणारे सगळेच परदेशात वास्तव्य करणारे आहेत, परंतु त्यांच्या लेखांतून त्यांनी जपलेल्या मराठीपणाच्या खुणा अगदी सहज ओळखता येतात.

वसंत / संपादक : दिलीप देशपांडे / वसंत प्रा. लि. / मुखपृष्ठ : सुनिल अमराळे / पृष्ठं : ८६ / किंमत : ६० रु.