स्लग - चविष्ट
..............................
चण्याच्या पिठापासून तयार केलेलं पिठलं किंवा झुणका आपण नेहमीच खातो. तो छानही लागतो, परंतु ओल्या चणाडाळीचा झुणकाही एगदी बेस्ट लागतो. भन्नाट चविष्ट... त्याची ही खास रेसिपी-
साहित्य - दोन मोठ्या वाट्या भिजवलेली चणा डाळ, दोन पळ्या तेल, दोन मोठे खांदे, दहा लसूण पाकळ्या सोलून, चार तिखट हिरव्या मिरच्या, एक चमचा मोहरी, थोडं हिंग, अर्धा चमचा हळद, चवीपुरतं मीठ-साखर, अर्धी वाटी चिरलेली कोथिंबीर
कृती - आदल्या रात्री भिजवलेली चणाडाळ, उपसून मिक्सरमध्ये भरड वाटून घ्या. मग गॅसवर पसरट कढई ठेवून त्यात जरा जास्तच तेल टाका. तेल तापलं की त्यात मोहरी आणि हिंग टाका. फोडणीचा खमंग वास आल्यावर त्यात आधी सोललेला लसूण बारीक चिरुन टाका. लसूण फोडणीत एकजीव झाल्यावर मिरच्या आणि कांदा बारीक चिरुन टाका. कांदा शिजला की त्यात मीठ-साखर घाला. नंतर भरड वाटलेली चणाडाळ टाकून वर झाकण मारा. डाळ भिजवलेली असल्यामुळे लगेच शिजते. ती शिजल्याचा अंदाज घेऊन झुणका वर-खालून नीट ढवळा. हा झुणका दाणेदार आणि सुटा होतो. वरुन चिरलेली कोथिंबीर टाका. असाच झुणका मिरचीऐवजी मसाला टाकूनही करू शकतो.
- वैदेही कारखानीस, घाटकोपर-मुंबई