दीडदमडी : करोनाष्टके

समर्थांनी सहज प्रतिभेने करुणाष्टके रचली होती. गेल्या दहा महिन्यांत आपण सर्वांनी जे भोगले, त्याला करोनाष्टक म्हणावे लागेल. वर्षाच्या शेवटच्या रविवारी, संपलेल्या काळाचा मागोवा घेताना, समर्थांच्या शब्दांची थोडी उधारी उसनवारी करून, कष्टाने रचलेले हे करोनाष्टक!

बहुदिन तवतापे तापलो मी जगी या

परमदिनदयाळा संपव ही तुझी माया

अपचन मज झाले, रे घरचे खाववेना

तीर्थाविण शिण होतो, आण रे आण आता॥ १॥

मुखवेष्टणी लपोनि सर्व हा काळ गेला

स्वजनजनमुखाचा जाम कंटाळा आला

रघुपती मति माझी, स्वच्छ बा तू करावी

लावूनि साबणा ती, जलधारी मग धरावी॥ २॥

विषय कोणताही, चर्चेत अन्य नाही

तुजविण उरलेले, फालतु सर्वकाही

जर तुज पुळका रे, हित माझे करावे

त्वरित उड्डाण तू चीनदेशी करावे॥ ३॥

तन मन धन माझे, संपले सर्व साचे

तूज करी शिवीगाळ, सर्व संसार वाचे

विचलित ना करावी, सर्वथा बुद्धी माझी

आधीच व्हायरसा तू, लावली वाट माझी॥ ४॥

सौंदर्य अर्धेमुर्धे मज पाहता पाहवेना

नेत्रांस नेत्रभाषा मज सांगता सांगवेना

घडी घडी बिघडे हा निश्चयो अंतरीचा

श्वास पुरता पुरेना, बोलतो दीनवाचा॥ ५॥

जळत एकटा न मी, जगभरी कोट्यानुकोटी

थाळीचा नाद केला, बडविली ताट वाटी

आदेश देत सुटला, जनतेस कारुण्यसिंधू

ना विचारिले कोणी, काय याचा संबंधू॥ ६॥

घालवून टाक वीज पेटवून दीप दीप

राजसा अजून मार्ग कोणता असेल चीप

परि करोन्या तू वेगे, पसरीलेच हात पाय

जणू वापरावा कुणी मोफतचा वायफाय॥ ७॥

आठव आठवले ते, गो करोना म्हणाले

सोप्या इंग्रजीत ते नो डरोना म्हणाले

तरीही ठोकला त्वा मुक्काम येथ साचा

रामदासे सांग काय, घ्यावा अर्थ याचा॥ ८॥

घालूनि हाफ चड्डी, तो लॅपटॉपी बैसे

शर्टास टाय शोभे, सर्वत्र दृश्य ऐसे

घालीत फोडणी ती, करते अटेंड कॉल

स्वप्नात राहिला तो, गर्भश्रीमंत मॉल॥ ९॥

हातांस रोज मारा, स्वच्छतेचा फवारा

लिक्विड साबणाचा फेस पसरे भरारा

येताच शिंक धसका, आप्त अन् मित्र घेती

कढत, गरम काढा, कोणी घशात ओती॥ १०॥

आरोग्य राखण्याची, जाहली सर्वत्र सोयू

बोटास म्हणे चिमटा, सांगतो प्राणवायू

बिनधास्त वागण्याची तू एक खूण जाण

कानांस मशीन सांगे, सांभाळ तापमान॥ ११॥

तुजविण करोन्या हे कोण जाणेल सांग

सगळे तुज म्हणती तव नानाची टांग

झडकरी झड घाली, धाड तुजला भरावी

कुठलीही लस येवो, मस्ती तुझी जिरावी॥ १२॥

- तंबी दुराई