दहशतवाद

>> ‍‍संजय पाटील, डोंबिवली (प.)

दूर कोसावर

एक ठिणगी जळत असलेली

बऱ्याच दिवसापासून दिसत होती

ही आग एवढ्या लवकर

माझ्या दारातून…

पायाच्या खाली येऊन पोहचेल

आणि होरपळून निघेल

मी आणि माझे सगळे कुटुंब

दूर कोसावरून

कानावर पडणारा स्फोटांचा

आवाज हळूहळू…

माझ्या कानाजवळ येऊन

कानठळ्या बसवेल

सांडेल रक्ताचा सडा

माझ्याच रक्ताच्या माणसांचा

आता चर्चा होईल सगळीकडे

आग कोणी लावली?

इंधन कोणी पुरवले?

स्फोटके कुणी आणली?

वणवा पेटला की ओल्यासोबत

सुकेही जळते…

दुःख एकाच गोष्टीचे वाटते

संपूर्ण जंगल जळून राख

झाल्यावर आम्हाला कळते.