स्लग -चविष्ट
...
मसूर पौष्टिक असले, तरी त्यांना स्वत:ची अशी खास चव नाही. किंबहुना ते बेचवच अधिक लागतात. मात्र एखाद्या दुसऱ्या भाजीबरोबर त्यांचा संगम घडवून आणला की मात्र मसुराचा भाव एकदम वधारतो. म्हणूनच भोपळा-मसुराच्या जोडीची ही आगळीवेगळी पण चटकदार भाजी-
साहित्य - पाव किलो लाल भोपळा, दीड वाटी मोड आलेले मसूर, दोन कांदे, एक वाटी भाजलेल्या कांदा-खोबऱ्याचं वाटण, एक टोमॅटो बारीक चिरुन, दोन चमचे मालवणी मसाला, अर्धा चमचा हळद, दोन मोठे चमचे तेल, चवीपुरतं मीठ.
कृती - आधी भोपळ्याचे बटाट्यासारखे लहान तुकडे करुन घ्या. नंतर कांदा बारीक कापून पसरट भांड्यात सोनेरी रंगावर परतून घ्या. कांदा शिजल्यावर त्यात, टोमॅटो, हळद आणि मालवणी मसाला टाका. कांदा-टोमॅटोला सुरेख लाल रंग आल्यावर त्यात भोपळा आणि अख्खे मसूर टाकून थोडंसं पाणी टाकून ते वाफेवर साधारण शिजवून घ्या. भोपळा आणि मसूर पटकन शिजतात, तेव्हा ते पिठासारखे शिजण्याआधीच त्यात कांदा-खोबऱ्याचं वाटण टाका. नंतर मीठ टाकून सर्व भाजी हळुवार खाली-वर करा. भाजी अगदीच सुकी होऊ नये म्हणून सोबत थोडं पाणी टाका आणि दोन मिनिटांनी गॅस घालवा. भोपळा आणि अख्ख्या मसुराची ही भाजी चमचमीत आणि चटकदार होते.
लक्ष्मी बाईत, वसई-ठाणे