स्लग - हाताची चव
...
मला विविध प्रकारचे पराठे खायला खूप आवडतात. परंतु त्यातही माझ्या आईच्या हातचा उडीद डाळीचा पराठा मला खूप आवडतो. चवीला उत्तम आणि प्रकृतीसाठी पौष्टिक असलेल्या या पराठ्याची ही रेसिपी-
साहित्य - दीड वाटी उडदाची डाळ, २ मोठ्या वाट्या कणीक, १ चमचा धनेपूड, दीड चमचा गरम मसाला, १ चमचा तिखट, १ चमचा मीठ, १ चमचा बडीशेपपूड
कृती -उडदाची डाळ रात्रभर पाण्यात भिजत घालावी, नंतर सकाळी उपसून बारीक वाटावी. नंतर थोड्या तुपावर डाळ परतून घ्यावी, तिच्यात मीठ तिखट, गरम मसाला, धनेपूड, बडीशेपपूड घालावी व जरा परतावे. झाकण ठेवून हे सगळं मिश्रण शिजू द्यावं. मधून मधून हलवावं. मिश्रण गार झाल्यावर कणीक चाळून घ्यावी, त्यात मीठ व तुपाचं मोहन घालून कणीक घट्ट भिजवावे. नंतर त्याचे बेताच्या आकाराचे गोळे करून ठेवावेत. गोळे करुन झाल्यावर एकेका गोळ्यात उडदाचे पूरण भरुन उंडा तयार करावा व हलक्या हाताने त्याची जाडसर पोळी लाटावी. नंतर तव्यावर दोन्हीकडून शेकून घ्यावी व नंतर विस्तवावर भाकरीप्रमाणे किंवा फुलक्याप्रमाणे शेकावी व त्याला तूप लावून ठेवावे. तूप सोडून हा पराठा छानच होतो, पण ज्याना तेल-तूप जास्त खायचं नसेल, त्यांनी नुसता शेकवलेला पराठा खायलाही हरकत नाही. हा उडादाचा पराठा अतिशय टेस्टी लागतो.
भाग्यश्री रासने, कल्याण