Puducherry : पुदुच्चेरी विधानसभा निवडणूक; कुणाची सत्ता येणार?

निवडणूक आयोगाने घोषणा केलेल्या ५ विधानसाभा निवडणुकांमध्ये पुदुच्चेरीचीही निवडणूक होत आहे. पुदुच्चेरीसाठी येत्या ६ एप्रिलला एकाच टप्प्यात मतदान होणार आहे. या निवडणुकीत पुदुच्चेरीत भाजपला अधिक जागा मिळतील असा अंदाज आहे.

महाराष्ट्र टाइम्स.कॉम 10 Mar 2021, 2:10 am

पुदुच्चेरीः निवडणूक आयोगाने केंद्रशासित प्रदेश पुदुच्चेरीमध्ये विधानसभा निवडणुकीची ( puducherry assembly election 2021 ) घोषणा केली आहे. पुदुच्चेरीमध्ये विधानसभेच्या एकूण ३३ जागा आहेत. यापूर्वी ३० जागांवर निवडणूक होते. तर तीन सदस्यांची नेमणूक केंद्र सरकारकडून करण्यात येते. पुदुच्चेरी विधानसभेच्या ३० जागांसाठी एकाच टप्प्यात मतदान होणार आहे. पुदुच्चेरीसाठी ६ एप्रिलला मतदान होईल.

puducherry legislative assembly — पुदुच्चेरीची विधानसभा निवडणूक कोण जिंकणार? (photo courtesy- pondytourism.in )

पुदुच्चेरीतील काँग्रेसचे सरकार काही दिवसांपूर्वीच कोसळले. विधानसभेत व्ही नारायणसामी सरकारला बहुमत सिद्ध करण्यात अपयश आलंय. यानंतर मुख्यमंत्री नारायणसामी यांनी आपला राजीनामा नायब राज्यपालांकडे सोपवला.

काँग्रेसने २०१६ मध्ये निवडणुकीत १५ जागांवर विजय मिळवला होता. डीएमकेच्या तीन आमदारांनी काँग्रेसला समर्थन जाहीर केलं होतं. यातील डीएमकेच्या आणि काँग्रेसच्या प्रत्येकी एका आमदारानं राजीनामा दिला. विधानसभेत विश्वासदर्शक ठरावादरम्यान काँग्रेस आणि डीएमकेच्या आमदारांनी 'वॉक आऊट' करत सभात्याग केला. यामुळे मुख्यमंत्री नारायणसामी हे बहुमत सिद्ध करण्यात अपयशी ठरल्याने त्यांचं सरकार कोसळलं.

निवडणूकपूर्व सर्वेक्षण काय आहे अंदाज?

टाइम्स नाउ आणि सी व्होटर्स यांनी ५ राज्यांच्या विधानसभा निवडणुकीपूर्वी सर्वेक्षण केलं. यात या निवडणुकीत भाजपला अधिक जागा मिळतील, असा अंदाज वर्तवण्यात आला आहे.

पुदुच्चेरी विधानसभा निवडणूक
एकूण जागा- ३०
मतदान- ६ एप्रिल रोजी (एकाच टप्प्यात मतदान)
निकाल- २ मे रोजी