राजस्थानात काँग्रेस कार्यकर्त्यांनी मागवले फटाके

जयपूर:

महाराष्ट्र टाइम्स.कॉम

राजस्थानात निवडणुकांचे निकाल येण्यास सुरुवात झाली असून काँग्रेसने पहिल्या कलांमध्ये १००हून अधिक जागांवर आघाडी घेतली असून काँग्रेसच्या कार्यालयांबाहेर आनंदाचं वातावरण आहेत. अनेक ठिकाणी काँग्रेस कार्यकर्त्यांनी फटाक्यांची ऑर्डर दिली असून सत्तास्थापनेचे अडाखे बांधण्यास सुरुवात झाली आहे.

राजस्थानमध्ये काँग्रेसची विजयी घोडदौड सुरू झाली आहे. काँग्रेसने पहिल्या कलांमध्येच बहुमताचा आकडा पार करताच कार्यकर्त्यांनी जल्लोष केला. सचिन पायलट यांच्या निवासस्थानाबाबाहेर ढोल,नगाड्यांचे वादन सुरू आहे. राजस्थानी महिलांनी पारंपारिक नृत्याने विजयाचा आनंद व्यक्त केला आहे. राहुल गांधी जिंदाबाद, सचिन पायलट जिंदाबादच्या घोषणांनी आसमंत दुमदुमतो आहे. अनेक ठिकाणी मिठाई वाटली जाते आहे.
मतमोजणी सुरू होण्याआधी राजस्थानच्या मुख्यमंत्री वसुंधरा राजे यांनी विजयासाठी देवाला साकडं घातलं होतं. पण सध्याची परिस्थिती पाहता राजे सरकार पुन्हा कोसळणार अशी चिन्हे आहेत. तर दुसरीकडे सचिन पायलट आणि अशोक गेहलोत या दोघांच्या गटांमधील गटबाजीही समोर येते आहे. दोन्ही गटांमध्ये आपल्या नेत्यालाच मुख्यमंत्री करण्यासाठी खलबतं होत आहेत. सत्तास्थापनेसाठी पुढील आखाडे बांधले जात आहेत. तेव्हा राजस्थानचे पुढचे मुख्यमंत्री कोण असतील हे पाहणं महत्त्वाचं ठरणार आहे.