सिद्धार्थ चांदेकरनं लिहिली 'तिच्या'साठी खास पोस्ट, अनेक अभिनेत्रींनी केलं भरभरून कौतुक

मुंबई : सिद्धार्थ चांदेकर हा एक उत्तम अभिनेता तर आहेच शिवाय तो एक संवेदनशील माणूसदेखील आहे. त्याचा हा संवेदनशीलपणा सोशल मीडियावर शेअर करत असलेल्या पोस्टमधून अनेकदा दिसतो. त्यामुळेच त्याने शेअर केलेल्या पोस्टचं युझर्स भरभरून कौतुक करत असतात. आता देखील सिद्धार्थने त्याच्या इन्स्टाग्राम अकाऊंटवर एक छान पोस्ट शेअर केली आहे. त्याची ही पोस्ट व्हायरलही होत आहे. सिद्धार्थने या पोस्टमधून जे विचार मांडले त्याचं युझर्स आणि चाहतेच नाही तर अनेक कलाकार त्यातही विशेष करून अभिनेत्री भरभरून कौतुक करत आहेत.

काय आहे सिद्धार्थ चांदेकरची

सिद्धार्थने पोस्ट शेअर करताना लिहिले की, घरातील काम, कुटुंबियांच्या गरजा, मुलांबाळांची कामं, ऑफिसमधील दगदग या रोजच्या धावपळीत 'ती' स्वत:साठी वेळ काढायलाच विसरून जाते. तू स्वत:साठी वेळ काढ, असे कोणीतरी तिला केवळ म्हटलं तरी ते पुरेसं होतं. सिद्धार्थने शेअर केलेल्या पोस्टला 'तिच्यासाठी' असे शीर्षक दिले आहे.


या पोस्टमध्ये त्याने म्हटले की, 'कशी आहेस? दमलीस ना? एक काम कर, जरा वेळ बस. हा चहा घे. केवढी दगदग करतेस? घरातलं पण बघा, व्यवसाय पण बघा, पोरं पण सांभाळा, तुम्हालाच जमू शकतं हे. आमच्यात नाही बाबा एवढी ताकद. पण आता जरा थांब. मस्त फिरून ये. मोकळी होऊन ये. नव्या मैत्रिणी कर,मज्जा कर. तुला परवानगी देणारा मी कोणीच नाही, तूच स्वतःला परवानगी दे. डोकं इथेच ठेव आणि त्या मनाला जग दाखवून ये. मी सांभाळतो तोपर्यंत इथलं. पण हे काय, तुझ्याशिवाय पान हलत नाही आमचं.' या पोस्टच्या कॅप्शनमध्ये सिद्धार्थने लिहिलं, 'तू हसलीस की घरात रंग येतात. तू मज्जा करत असलीस की जग सुंदर दिसतं. जा, फिरून ये, जग बघून ये. मी आहेच.'


अभिनेत्रींनीही केले सिद्धार्थचे कौतुक

सिद्धार्थने लिहिलेल्या पोस्टवर त्याच्या चाहत्यांनी भरभरून कमेन्ट केल्या आहेत. इतकेच नाही तर अनेक अभिनेत्रींनीदेखील सिद्धार्थने जे विचार मांडले त्याबद्दल त्याचं कौतुक केलं. यामध्ये स्पृहा जोशी, मधुरा देशपांडे यांचा समावेश आहे.

दरम्यान, सिद्धार्थ चांदेकर याचा 'झिम्मा' हा सिनेमा आज १९ नोव्हेंबर रोजी थिएटरमध्ये प्रदर्शित होत आहे. या सिनेमात सिद्धार्थसोबत सोनाली कुलकर्णी, सुचित्रा बांदेकर, सिद्धार्थ चांदेकर, निर्मिती सावंत, मृण्मयी गोडबोले, सायली संजीव, क्षिती जोग, सुहास जोशी हे प्रसिद्ध कलाकार दिसणार आहेत. या सिनेमाचे दिग्दर्शक हेमंत ढोमेनं केलं आहे.