अभिनेत्री वर्षा दांदळे यांचा अपघात; चाहत्यांना केली प्रार्थना करण्याची विनंती

मुंबई : आपल्या नैसर्गिक अभिनयाने विविध भूमिका साकरत प्रेक्षकांच्या मनावर अधिराज्य गाजवणारी लोकप्रिय अभिनेत्री वर्षा दांदळे यांचा अपघात झाला आहे. या अपघातामध्ये त्यांना गंभीर दुखापत झाली आहे. ही माहिती खुद्द वर्षा यांनी त्यांच्या इन्स्टाग्राम अकाऊंटवरून एक पोस्टद्वारे दिली आहे. याच पोस्टमध्ये त्यांनी चाहत्यांना एक भावनिक आवाहनही केले आहे.


अभिनेत्री वर्षा दांदळे यांनी त्यांच्या अपघाताची एक पोस्ट इन्स्टाग्रामवर शेअर केली आहे. त्यामध्ये त्यांनी लिहिले आहे की, 'काही दिवसांपूर्वी मला अपघात झाला. त्यात माझ्या पायाला दुखापत झाली. सुरुवातीला फार त्रास होत नव्हता परंतु आता माझा पाय फारच त्रास देत आहे. त्याचप्रमाणे पाठीच्या मणक्याला देखील त्रास होत आहे. हा अपघात फार भीषण होता. आता मी सध्या घरी आराम करत आहे. माझ्यासाठी तुम्ही सगळ्यांनी सदिच्छा व्यक्त करून प्रार्थना करा,' असे आवाहन वर्षा यांनी त्यांच्या चाहत्यांना केले आहे.

वर्षा यांच्या या पोस्टवर नांदा सौख्य भरे या मालिकेत त्यांच्याबरोबर काम करणारी अभिनेत्री ऋतुजा बागवे हिने 'ताई काळजी घे 'अशी कॉमेन्ट केली आहे. त्याचप्रमाणे लेखक दिग्दर्शक प्रल्हाद कुडतरकर, सचिन दरेकर यांच्यासह अनेक चाहत्यांनी कॉमेन्टमधून काळजी घेत, आराम करण्याचा सल्ला वर्षा यांना दिला आहे.




दरम्यान, वर्षा यांनी काम केलेली 'पाहिले न मी तुला' ही मालिका लोकप्रिय झाली होती. या मालिकेत त्यांनी उषा म्हणजेच अनिकेतच्या आईचे काम केले होते. त्याचबरोबर वर्षा यांनी 'नांदा सौख्यभरे' या मालिकेत वच्छीआत्या ही भूमिका साकारली होती. त्यांची ही भूमिका प्रेक्षकांना खूप आवडली होती. याशिवाय वर्षा यांनी एकाच या जन्मी जणू, आनंदी हे जग सारे यांसारख्या अनेक मालिकांमध्ये तसेच नाटकांमध्ये ही काम केले आहे. अभिनयाबरोबरच वर्षा यांनी सवेरेंवाली गाडी या नाटकाचे लेखन आणि दिग्दर्शन केले आहे.