राहुल वैद्यच्या घरी सत्यनारायणाची पूजा, दिशाच्या मराठमोळ्या लुकनं वेधलं सर्वांचं लक्ष

मुंबई : गायक आणि बिग बॉसमुळे प्रसिद्ध झालेला राहुल वैद्य आणि दिशा परमार यांनी थाटामाटात लग्न केले. दोघांच्या लग्नाचे अनेक फोटो आणि व्हिडिओ सोशल मीडियावर शेअर झाले होते. दोघांच्या चाहत्यांनी आणि सेलिब्रिटींनी या प्रेमी युगुलाला त्यांच्या नव्या आयुष्यासाठी भरभरून शुभेच्छा दिल्या. स्वतः राहुल आणि दिशानेही त्यांच्या सोशल मीडिया अकाउंटवरून काही फोटो शेअर केले होते.राहुल आणि दिशाच्या लग्नासोबतच त्यांच्या रिसेप्शनचेही फोटो, व्हिडीओ सोशल मीडियावर व्हायरल झाले आहेत. त्याची चर्चा अजूनही सुरू आहे. लग्नानंतर दिशाने वैद्य कुटुंबात केलेल्या गृहप्रवेशाचा व्हिडीओ देखील राहुलने त्याच्या इन्स्टाग्रामवर शेअर केला आहे. त्यावर या दोघांचे चाहते भरभरून कमेन्ट करत असून या दोघांना शुभेच्छा देत आहेत.


सर्वसाधारणपणे लग्नानंतर महाराष्ट्रीयन कुटुंबामध्ये सत्यनारायणाची पूजा केली जाते. तशीच पूजा राहुल वैद्यच्या घरीही झाली. ही पूजा नवदाम्पत्याच्या हस्ते झाली. या पूजेच्या वेळी दिशा आणि राहुलने अस्सल मराठमोळा पेहराव केला होता.

दिशाने गुलाबी आणि केशरी अशा रंगसंगतीची साडी नेसली होती. तसेच केसांचा आंबाडा घालून त्यावर गजरा माळला होता, गळ्यात मंगळसूत्र आणि काही सोन्याचे दागिने, हातामध्ये चुडा आणि नाकात टपोऱ्या मोत्यांची नथ घातली होती. तर राहुलने धोती-कुर्ता घातला होता. हे दोघेजण खूप सुंदर दिसत होते. दिशा तर मराठमोळ्या वेशभूषेमध्ये खूपच सुरेख दिसत होती.


राहुल आणि दिशा अनेक वर्षांपासून रिलेशनमध्ये होते. परंतु जेव्हा राहुल बिग बॉसच्या घरात गेला तेव्हा त्याला भेटायला आलेल्या दिशाला त्याने लग्नाची मागणी घातली होती. त्यामुळे या दोघांची खूप चर्चा झाली होती.