बिग बॉस: शिवच्या बोलण्याने दुखावणार वीणा!

मुंबई : बिग बॉसच्या घरात नेहमी चर्चेत असलेली दोन नावे म्हणजे वीणा आणि शिव! घरामध्ये या दोघांचे एकमेकांशिवाय पानही हलत नाही. पण आज चक्क या दोघांत गैरसमज निर्माण होणार आहेत. या गैरसमजामुळे शिव रागाच्या भरात वीणावर ओरडेल आणि त्याने वीणा खूप दुखावली जाणार आहे. त्यामुळे या छोट्याश्या वादामुळे या दोघांच्या मैत्रीवर परिणाम होणार की मैत्रीचं नातं कायम राहणार हे पाहणं औत्सुक्याचे ठरेल.

बिग बॉसच्या घरात जिथं वीणा तिथं शिव असं चित्रं पाह्यला मिळतं. कालच्या विकेंडच्या डावातही महेश मांजरेकरांनी 'एकमेकांकडे दुर्लक्ष करून आता खेळाकडे लक्ष द्या' असा सल्ला शिवला दिला होता. आज या दोघांमधील वादाला सुरुवात झालेली पाह्यला मिळणार आहे. वीणा शांत बसलेली पाहून शिव तिची विचारपूस करायला जाईल आणि दोघांमधील गैरसमजाला तोंड फुटेल. कारण अगदी साधं आहे! वीणा शिवला हळू बोलायची विनवणी करेल. याचा शिवला राग येईल आणि रागाच्या भरात शिव वीणावर ओरडेल.

आजच्या भागात शिवच्या बोलण्याने दुखावलेली वीणा किशोरीताईंकडे आपलं मन मोकळं करतानाही दिसणार आहे. त्यामुळे वीणाला दुखावण्यासारखं शिव नेमकं काय बोलला आणि त्याबद्दल वीणा किशोरीताईंना काय सांगेल याचं रहस्य आजच्या भागातच उलगडणार आहे.