'पठाण'च्या सेटवरही करोनाचं संक्रमण, शाहरुख खाननं स्वतःला केलं क्वारंटाइन

मुंबई: शाहरुख खान बऱ्याच काळानंतर मोठ्या पडद्यावर परतणार आहे. लवकरच तो 'पठाण' चित्रपटातून पुनरागमन करत आहे. सध्या शाहरुख या चित्रपटाच्या शूटिंगमध्येच बिझी आहे पण आता या चित्रपटाच्या सेटवरही करोनाचं संक्रमण झालं आहे. 'पठाण'च्या काही कर्मचाऱ्यांना करोना व्हायरसची लागण झाल्यानं या चित्रपटाचं शूटिंग थांबवण्यात आलं आहे.

'पिंकव्हिला'नं दिलेल्या वृत्तानुसार चित्रपटाच्या सेटवर काम करणाऱ्या काही कर्मचाऱ्यांचे रिपोर्ट करोना पॉझिटिव्ह आले आहेत ज्यामुळे चित्रपटाचं शूटिंग थांबवण्यात आलं आहे. तसं पाहायला गेलं तर या चित्रपटाचं सर्वाधिक शूटिंग दुबईमध्येच झालं आहे. पण चित्रपटातील काही भाग मुंबईमध्ये चित्रित होत आहे आणि सध्या मुंबईमध्ये करोनाचा उद्रेक झालेला पाहायला मिळत आहे.


'पठाण'च्या सेटवरील काही कर्मचारी करोना पॉझिटिव्ह सापडल्यानंतर शाहरुख खाननं सुद्धा स्वतःला क्वारंटाइन केल्याचं वृत्त 'टाइम्स नाऊ'ने दिलं आहे. मात्र याबाबत कोणतीही अधिकृत माहिती अभिनेता किंवा चित्रपटाच्या टीमकडून मिळालेली नाही.

मीडिया रिपोर्टनुसार क्रू मेंबर्सचे रिपोर्ट करोना पॉझिटिव्ह आल्यानंतर चित्रपटाच्या टीममधील सर्व सदस्यांनी स्वतःची करोना चाचणी करून घेतली आहे आणि आपल्या रिपोर्टची वाट पाहत आहेत. अशात चाहते शाहरुख खानच्या ठीक असण्याची प्रार्थना करताना दिसत आहेत.