शाहरुखला इंग्रजीत होते फक्त एवढे मार्क्स!

मटा ऑनलाइन वृत्त । मुंबई

बॉलिवूडचा किंग खान शाहरूखचे इंग्रजी भाषेवर असलेले प्रभुत्व आपल्याला ठाऊक आहे. सध्या किंग खान इंग्रजीत मिळालेल्या गुणांवरून चर्चेत आला आहे. शाहरूखचा प्रवेश अर्ज सोशल मिडियावर व्हायरल झाला आहे. या अर्जात त्याला इंग्रजीत मिळालेले गुण दिसत असून सध्या चर्चेचा विषय झाला आहे.

हंसराज महाविद्यालयाचा हा प्रवेश अर्ज इंटरनेटवर धुमाकूळ घालत आहे. विद्यार्थ्यांसाठी तयार करण्यात आलेल्या दिल्ली विद्यापीठाच्या टाइम्स वेबसाईटच्या माध्यमातून शेअर झाला आहे. या फोटोत शाहरुखला मिळालेल्या मार्कांवर नजर टाकल्यास शाहरुखला इंग्रजीत ५१ मार्क्स मिळाले असल्याचे दिसते. 'पिंकव्हिला'ने दिलेल्या बातमीनुसार, हा प्रवेश अर्ज खरं असल्याचे वेबसाइटचे अॅ़डमिन मिहलाज हुसेन यांनी सांगितले. विद्यार्थी, लोकांना यापासून प्रेरणा मिळावी असा यामागील उद्देश आहे. तुम्ही ध्येय गाठण्यासाठी मेहनत करत असाल, तर परिक्षेतील काही गुण तुमच्यासाठी दुय्यम ठरतात. विद्यार्थ्यांना अधिकाधिक प्रेरणा मिळावी हाच या पोर्टलचा मुख्य उद्देश आहे असेही हुसेन यांनी सांगितले.



मागील महिन्यात प्रतिष्ठेच्या मानल्या जाणाऱ्या 'टेड' च्या विचारपीठावर शाहरुखने दिलखुलासपणे आपली मते व्यक्त केली होती. 'टेड'ने हा व्हिडिओ आपल्या युट्यूब चॅनेलवर प्रसिद्ध केला. यामध्ये शाहरुखने आपल्या जीवनातील करियरच्या सुरुवातीपासून ते आपल्या खाजगी जीवनातील गोष्टींचा उल्लेख केला.