मोखाड्याच्या बालकलाकाराची पुरस्कारावर मोहोर

म. टा. वृत्तसेवा, पालघर

पालघर आदिवासीबहुल जिल्ह्यातील मोखाड्यातील शिक्षकांनी 'मधली सुट्टी' हा लघुपट साकारला आहे. या लघुपटात भूमिका करणारा बालकलाकार विकास वाजे या बालकलाकाराला औरंगाबाद राष्ट्रीय लघुपट महोत्सव २०१८चा सर्वोत्कृष्ट बालकलाकार हा पुरस्कार मिळाला आहे.

मोखाड्यासारख्या दुर्गम भागातील गरिबी, बेरोजगारी, घरी अठराविश्वे दारिद्र्य अशा परिस्थितीत शिक्षण घेण्याची ओढ, त्याशिवाय स्वतःच्या शिक्षणासह घरी असलेल्या आपल्या भावंडांची भूक भागविण्याच्या विवंचनेत सापडलेल्या विद्यार्थ्यांची गोष्ट लघुपटाच्या माध्यमातून मांडण्याचा प्रयत्न मोखाड्यातील शिक्षक अमोल सूर्यवंशी आणि त्यांच्या सहकाऱ्यांनी केला आहे. 'मधली सुट्टी' या लघुपटातील बालकलाकारही मोखाड्याच्या शेवटच्या टोकाच्या बिवलपाडा येथील आहे. त्याला नुकताच औरंगाबाद राष्ट्रीय लघुपट महोत्सवात सर्वोत्कृष्ट बालकलाकाराचा पुरस्कार मिळाला. एकही संवाद नसताना केवळ चेहऱ्यावरच्या हावभावावर त्याने या पुरस्कारावर मोहोर उमटवली आहे. आधीही हा लघुपट अनेक राष्ट्रीय आणि आंतरराष्ट्रीय चित्रपट महोत्सवात सहभागी झाला आहे.

बिवलपाड्यात आजही जाण्यासाठी रस्ता नाही. तेथील जिल्हा परिषदेच्या शाळेत शिक्षक असलेल्या अमोल सूर्यवंशी या शिक्षकाने शाळेतील खिचडी उरवून घरी नेऊन घरच्या भावंडांना खाऊ घालणाऱ्या विद्यार्थ्याची कथा या लघुपटामध्ये रेखाटली आहे. अवघ्या १२ मिनिटांचा हा लघुपट असून तीन ते चार दिवसांच्या या चित्रिकरणात एकही रिटेक घ्यावा लागला नाही, असे शिक्षकांनी सांगितले. यापूर्वी कधीही अभिनय न केलेल्या विकास वाजे या बालकलाकाराने यातील जो इक्या ही भूमिका रेखाटली आहे. एका गरीब कुटुंबातील हा मुलगा शाळेत येतो खरा, मात्र दररोज दुपारी तो माध्यान्ह भोजनानंतर गायब होतो. यामुळे अनेकदा त्याला शिक्षकांचा मार खावा लागतो. मात्र या मुलाच्या घरी आणखी दोन छोटी भावंडे असतात. त्यांना ही शाळेची खिचडी नेऊन तो भरवत असतो. व्यसनी बाप आणि हे जग सोडून गेलेली आई यामुळे आपल्या भावंडाची भूक भागविण्यासाठी तो घरी खिचडी घेऊन जात असतो, अशी या लघुपटाची गोष्ट आहे. या लघुपटाचे चित्रिकरण मोखाड्यातच झाले आहे. लघुपटात अभिनय करणारे सर्व शिक्षक मित्र असून एकही कलाकार व्यावसायिक अभिनेता नाही. पुणे येथे झालेल्या तिसऱ्या आंतरराष्ट्रीय लघुपट महोत्सवातही या लघुपटाची निवड झाली आहे.

कलाकार : विकास वाजे, प्रवीण घुले, लक्ष्मण ढोरकुले

कथा-पटकथा-दिग्दर्शन : अमोल सू्र्यवंशी

संवाद : नवीनकुमार कलदुर्के

संगीत : आनंद ओक

छायाचित्रण : सागर महाजन, विजय शितोळे

निर्माता : अमोल सूर्यवंशी आणि नवीनकुमार कलदुर्के