रंगभेदावरून शाहरुख खान, दीपिका निशाण्यावर

मटा ऑनलाइन वृत्त। नवी दिल्ली

अभिनेता अभय देओल याने आपल्या फेसबुक पेजवरून बॉलीवूड अभिनेते आणि अभिनेत्री यांच्यावर जाहिरातींच्या माध्यमातून लोकांना गोरे बनण्याच्या क्लुप्त्या सांगत रंगभेद पसरवण्याचा आरोप केला आहे. अभय देओलने या विषयावरून शाहरुख खान, दीपिका पडुकोण, विद्या बालन यांच्यासारखा आघाडीच्या कलाकारांसह इतर अनेक कलाकारांना आपल्या टीकेचे लक्ष्य केले आहे.

अभय देओलने बुधवारी आपल्या फेसबुक पेजवर अनेक जाहिराती पोस्ट केल्या. या जाहिरातींमध्ये बॉलीवूड सेलिब्रिटी फेअरनेस क्रीमच्या वापराने गोरे बनता येते असा दावा करत असल्याचे दिसत आहे. जगभरात रंगभेदाबाबत गंभीर चर्चा सुरू असताना अभय देओलने घेतलेल्या या भूमिकेमुळे त्याची प्रशंसा होऊ लागली आहे.

अनेकांनी तर अभय देओलचे रंगभेदाविरोधी अभियान भाजप खासदार तरुण विजय यांच्या अल् जजिराला दिलेल्या मुलाखतीशी देखील जोडले आहे. या मुलाखतीत तरुण विजय म्हणतात, ' भारत वंशवादी देश नाही. जर असे असते तर आमच्याकडे दक्षिण भारत कसा असता?. आम्ही त्यांच्यासोबत कसे राहिलो असतो?. आमच्या चारी बाजूंना सावळे लोक राहतात.' तरुण विजय यांच्या या वक्तव्यानंतर देशभरात वंशवादासंदर्भात जोरदार चर्चा सुरू झाली होती.

अभय देओलने आपल्या विविध फेसबुक पोस्टद्वारे शाहरुख खान, जॉन अब्राहम, इलियाना डिक्रूज, विद्या बालन, शाहीद कपूर, दीपिका पडुकोण, सोनम कपूर, सिद्धार्थ मल्होत्रा अशा कलाकारांची छायाचित्रे असलेल्या जाहिराती लोकांपुढे मांडल्या आहेत.

अभय देओलने प्रसिद्ध केलेल्या काही पोस्टचे स्क्रीन शॉट्स -