वाढदिवस माझा नावडता: संजय मोने

वाढदिवस सर्वांनाच प्रिय असतो. पण, ज्येष्ठ अभिनेते-लेखक संजय मोने यांना मात्र हा दिवस लहानपणापासूनच आवडत नाही. त्याचंही एक कारण आहे. यंदाच्या वाढदिवसानिमित्त त्यांनी हे 'मुंटा'शी शेअर केलं.

खरं सांगायचं तर वाढदिवसावरुन लहानपणापासूनच माझी खूप चिडचिड व्हायची. त्याचं कारण माझ्या वाढदिवसाची तारीख. मे महिन्यात वाढदिवस येत असल्यानं शाळेत कधीच माझा वाढदिवस साजरा झाला नाही. ज्या मुलाचा-मुलीचा वाढदिवस असायचा ते त्या दिवशी शाळेमध्ये सर्वांना चॉकलेट वाटायचे. आमच्या लहानपणी पाच पैशांना पाच चॉकलेट्स मिळायची. सर्वांना चॉकलेट्स वाटली जायची. मला मात्र कधीच चॉकलेट्स वाटायला मिळाली नाही. त्यामुळे मला खूप राग यायचा. माझा वाढदिवस साजरा होत नाही म्हणजे काय? असं म्हणत मी आईवर रागवायचो. प्रत्येक वाढदिवसाला तिच्याशी वाद घालायचो. तेव्हापासूनच वाढदिवसाबद्दल माझ्या मनात काहीशी अढी निर्माण झाली होती. त्यामुळे मी वाढदिवस साजरा वगैरे करणं मला अजिबात आवडत नाही.

आठ वर्षांपूर्वी माझा पन्नासावा वाढदिवस होता. मला नेहमीप्रमाणे तो साजरा करायचा नव्हता. घरच्या मंडळींनी मला विचारलं, 'पन्नासावा वाढदिवस आहे...कसा साजरा करू या?' पण, मी ठामपणे नाही म्हटलं. मुलीनं, पत्नीनं समजावून पाहिलं. शेवटी पत्नी म्हणाली, 'ठीक आहे, साजरा नका करू. पण मित्रमंडळींना तर भेटू'. होय-नाही करता-करता मी तयार झालो. मग त्या दिवशी आम्ही सगळे हॉटेलमध्ये गेलो. बायकोनं तिथं माझ्या सर्व मित्रांना बोलावलं होतं. माझ्यासाठी तो आश्चर्याचा धक्का होता. मग, पुढे जसं या कार्यक्रमांमध्ये जे होतं ते सर्व काही यथासांग पार पडलं आणि पन्नासावा वाढदिवस साजरा झाला.

शब्दांकन - हर्षल मळेकर