तेव्हा मुलं माझा स्कर्ट खेचत: परिणीती चोप्रा

मटा ऑनलाइन वृत्त । मुंबई

'मलाही लहानपणी छेडछाडीचा सामना करावा लागला आहे. सायकलवरून शाळेत जाताना अनेकदा मुलं माझा पाठलाग करायची. कधी-कधी माझा स्कर्टही खेचायची,' अशी आठवण अभिनेत्री परिणीती चोप्रानं सांगितली आहे.

बॉलिवूडचा 'खिलाडी' अक्षय कुमारने मुंबईत महिलांसाठी 'वुमन्स सेल्फ डिफेन्स सेंटर' सुरू केले आहे. या सेंटरच्या पदवीदान सोहळ्यासाठी परिणीती उपस्थित होती. तेव्हा तिने महिलांना स्वसंरक्षणाचे महत्व पटवून देताना लहानपणी तिला आलेले अनुभव सर्वांसमोर ठेवले.

'मी हरियाणातील अंबाला या एका छोट्या शहरात वाढले. तिथं मुलगी म्हणून मला अनेक अडचणींना सामोरं जावं लागलं. आमच्याकडे गाडी नव्हती ना बसने जाण्याइतके पैसे.. त्यामुळे मी सायकलवरून शाळेत जायचे. पण तेव्हा आजूबाजूची अनेक मुलं माझी छेड काढत. माझा स्कर्टही खेचत असत. या सगळ्या प्रकारामुळं मला घरच्यांचा खूप राग यायचा. तुम्ही मला शाळेत सोडायला का येत नाहीत? असंही मी त्यांना विचारायचे' असं परिणीती म्हणाली. मात्र, 'तुझ्यावरील संकटांचा सामना तुलाच करावा लागेल' असं सांगून माझे बाबा मला लढण्याची हिंमत द्यायचे, असंही तिनं सांगितलं.

'आजच्या मुली खूप नशीबवान आहेत. त्यांना स्वसंरक्षणाचे प्रशिक्षण मोफत मिळतंय. माझ्यासारख्या लाखो मुलींकडे ही सुविधा नव्हती. देव ना करो, पण तुमच्यावर असा प्रसंग आलाच तर समोरच्याला एक पंच मारून स्वत:चे रक्षण करा,' असा सल्लाही परिणीतीने तरुणींना दिला.