आंतरराष्ट्रीय मीडिया विकत घेता येता नाही; रिचा चड्ढाचा मोदींना टोला

मुंबई:

अमेरिकेतील प्रतिष्ठित टाइम साप्ताहिकाच्या अंकात 'इंडियाज् डिवाइडर इन चीफ' या पंतप्रधान नरेंद्र मोदी यांच्यावरील लेखामुळे नवे वादळ निर्माण झाले आहे. त्याचाच आधार घेत अभिनेत्री रिचा चड्ढाने मोदींवर टीकास्त्र डागलंय.

टाइम साप्ताहिकाच्या २० मे २०१९ ला प्रसिद्ध होणाऱ्या अंकात मुखपृष्ठावर मोदी यांच्या छायाचित्रासह मोदींना 'भारताचे विभाजनप्रमुख' संबोधले आहे. रिचानं टाइम साप्ताहिकातील हा कव्हर फोटो तिच्या ट्विटरवर शेअर केलाय. 'जेव्हा तुम्ही आंतरराष्ट्रीय प्रसारमाध्यमांना विकत घेऊ शकत नाही' असं म्हणत तिनं पंतप्रधान मोदींना आणि भाजप सरकारला टोला लगावला आहे.
रिचा चड्ढाने शेअर केलेल्या या फोटोनंतर तिला सोशल मीडियावर ट्रोलदेखील करण्यात आलं. परंतु, तिचे अनेक चाहते तिच्या बाजूनं उभे राहिले आणि तिला ट्रोल करणाऱ्यांना त्यांनी उत्तरं दिली.