तृप्ती भोईर अडकली लग्नाच्या बेडीत

मटा ऑनलाइन वृत्त । चेन्नई

मराठमोळी अभिनेत्री तृप्ती भोईर दाक्षिणात्य संगीतकार टी. सतीश चक्रवर्तीसोबत विवाहबंधनात अडकली आहे. चेन्नईमधील एव्हीएम मेना हॉलमध्ये हा विवाहसोहळा पार पडला. ‘अगडबम’ चित्रपटात तिनं साकारलेली 'नाजुका' ही व्यक्तीरेखा अनेकांना पसंत पडली होती.

चित्रपटसृष्टीत येण्यापूर्वी तृप्ती भोईर रंगमंचावर सक्रिय होती. तिने ‘चार दिवस सासूचे’, ‘वादळवाट’ या मालिकांमध्ये तसेच ‘इंद्राक्षी’, ‘सही रे सही’ या नाटकांमध्येही काम केले आहे. ‘तुझ्या माझ्या संसाराला आणि काय हवे’, ‘अगडबम’, ‘हॅलो जय हिंद’, ‘टुरिंग टॉकिज’ असे अनेक चित्रपट तृप्तीने दिग्दर्शित केले असून त्यापैकी काही चित्रपटामध्ये अभिनयही केला आहे.

दरम्यान, तृप्ती भोईरचे पती टी. सतीश चक्रवर्ती व्यवसायाने संगीतकार असून त्यांनी तामिळमधील अनेक चित्रपटाला संगीत दिले आहे. २००६ पर्यंत त्यांनी संगीतकार ए. आर. रेहमानसोबत काम केले आहे.