'राम'नामाचा टॉप; वाणी कपूरवर भडकले फॅन्स

मुंबई:
अभिनेत्री वाणी कपूरने आपल्या इन्स्टाग्राम वर एक फोटो शेअर केला. यात तिने फ्रंट नॉट क्राप टॉप घातला होता. या लुकमध्ये ती खूप सुंदर दिसत होती, तिच्या फॅन्सनीही तिचं खूप कौतुक केलं. पण काहींना तिच्या त्या टॉपवरची अक्षरं दिसली आणि मग तिच्यावर कौतुकाऐवजी टीकेचा वर्षाव होऊ लागला. तिच्या टॉपवर 'हरे रामा हरे कृष्णा' लिहिलं होतं.

त्या टॉपचं एकूण स्वरुप पाहता त्यावर ही धार्मिक अक्षरे लिहिलेली प्रिंट नको होती, असं लोकांचं म्हणणं होतं. काहींची माथी भडकली. तिच्या सिनेमांवर बहिष्कार घालू अशा आशयाच्या देखील प्रतिक्रिया आल्या. काहींनी तिच्याकडे जाहीर माफीची मागणी केली. 'नाव रामाचं पण काम मात्र रावणाचं', असंही काहींनी म्हटलं तर, 'तू जे काही कपडे घातले आहेस त्यामुळे आम्ही याचा निषेध करतो,' असंही एकाने म्हटलं आहे.





हटवले फोटो

या सगळ्या गोंधळानंतर अखेर वाणीने हे फोटो इन्स्टाग्रामवरून काढून टाकणे पसंत केले. मात्र अद्यापपर्यंत तिने या प्रकाराबद्दल कोणतीही प्रतिक्रीया दिलेली नाही. वाणी कपूरने ही छायाचित्रे हटवल्यानंतरही लोकांच्या प्रतिक्रिया येतच होत्या.

वाणी कपूर ही अभिनेत्री अलीकडेच 'वॉर' या सिनेमात दिसली होती. या सिनेमाला बॉक्स ऑफिसवर भरपूर प्रतिसाद मिळाला होता. वाणीसोबत या सिनेमात अभिनेता ऋतीक रोशन आणि टायगर श्रॉफ यांच्या प्रमुख भूमिका होत्या. वाणीच्या भूमिकेचंही कौतुक झालं होतं.

वाणी कपूरने आपल्या करिअरची सुरुवात छोट्या पडद्यापासून केली होती. राजुबेन या शोद्वारे तिने पदार्पण केले होते. सुशांत सिंह राजपूतसोबत ती शुद्ध देसी रोमान्स या सिनेमातही दिसली होती. सर्वोत्कृष्ट अभिनयासाठी वाणीला फिल्मफेअर अवॉर्डतर्फे सर्वोत्कृष्ट पदार्पणाचा पुरस्कारही मिळाला होता.