बॉडीगार्डच्या ठोशाबद्दल अक्षयचा माफीनामा

मटा ऑनलाइन वृत्त । मुंबई

मुंबई विमानतळावर अभिनेता अक्षय कुमारसोबत सेल्फी काढू पाहणाऱ्या तरुणाला त्याच्या बॉडीगार्डनं ठोसा लगावल्याबद्दल अक्षयनं चाहत्यांची माफी मागितली आहे.

काही दिवसांपूर्वी अक्षय कुमार मुंबई विमानतळावरून बाहेर पडत असताना एक चाहता त्याच्यासोबत सेल्फी काढण्याचा प्रयत्न करत होता. त्यावेळी अक्षयच्या बॉडीगार्डनं त्याला जोरदार ठोसा लगावला. सोशल मीडियावर हा व्हिडीओ व्हायरल झाल्यानंतर या प्रकाराबद्दल अनेकांनी तीव्र नाराजी व्यक्त केली होती.

चाहत्यांच्या प्रतिक्रियांची दखल घेऊन अक्षय कुमारनं ट्विटरच्या माध्यमातून सर्वांची माफी मागितली आहे. 'जे झालं त्याचं मला वाईट वाटतं. असं व्हायला नको होतं. मी विमानतळावर असताना काहीतरी गोंधळ झाल्याचं मला कळलं होतं. पण नेमकं काय झालं हे माहीत नव्हतं. काही वेळानं कळलं की माझ्या बॉडीगार्डनं एका चाहत्याला मारलंय. हे समजताच मी बॉडीगार्डला झापलं आणि पुन्हा अशी चूक न करण्याची तंबी दिली. झाल्या प्रकाराबद्दल मी पुन्हा एकदा दिलगिरी व्यक्त करतो. त्या चाहत्याची माफी मागतो. माझे सर्व चाहते माझ्यासाठी मोलाचे आहेत. अशा प्रकारची घटना भविष्यात होणार नाही,' असंही त्यानं ट्विटमध्ये म्हटलं आहे.