अक्षय कुमारला काढायचीय मुलींसाठी शाळा

मटा ऑनलाइन वृत्त । नवी दिल्ली

अभिनेता अक्षयकुमार त्याच्या समाजसेवेमुळे सातत्याने चर्चेत असतो. कधी सैनिकांना मदत कर कधी शेतकऱ्यांच्या मदतीला धावून जा असे सतत गरजूंसाठी काही ना काही करत त्यातच तो देशसेवेची धन्यता मानतो. आता त्याला राजधानी दिल्लीतल्या मुलींना स्वसंरक्षणाचे धडे द्यायचे आहेत. त्यासाठी तिथे एक शाळा सुरू करायची आहे.

मार्शल आर्टवर वर्चस्व असणारा अक्षय कुमार मुलींना आत्मसंरक्षणासंदर्भात सल्ला देण्यासाठीही मागे हटला नाही. येत्या शुक्रवारी त्याचा सिनेमा 'नाम शबाना' प्रदर्शित होत आहे. या सिनेमाच्या टीमसोबत तो सोमवारी दिल्लीतल्या गार्गी महाविद्यालयात गेला होता. तिथे विद्यार्थिनींशी संवाद साधताना तो म्हणाला, 'तुम्हाला वाईट इराद्याने कोणी हात लावायचा प्रयत्न केला तर घाबरून न जाता त्याला विरोध करायला हवा.'

मुलींना कोणत्याही वेळी, कोणत्याही ठिकाणी जाण्याचे स्वातंत्र्य आहे; पण काही वाईट प्रवृत्तींमुळे त्यांना त्रास होतो. त्यासाठी स्वसंरक्षणाचे धडे गिरवा, असे अक्षय म्हणतो. अभिनेता मनोज वाजपेयी, अभिनेत्री तापसी पन्नू आणि निर्माता नीरज पांडेदेखील या कार्यक्रमात अक्षयसोबत उपस्थित होते.

अक्षय कुमार म्हणाला, 'माझी मुंबईत एक शाळा आहे. आणि इथे दिल्लीतही मला एक शाळा उघडायची आहे. माहित नाही ती कधी उघडणार. पण एक गोष्ट तुम्हाला सांगतो, कोणीही तुम्हाला नकोसा स्पर्श केला तर घाबरून जाऊ नका, उलट तत्काळ त्याचा विरोध करा. जेव्हा मुलींकडून प्रत्युत्तर मिळत नाही, तेव्हाच पुरुषांचा धीर चेपतो.'